World Health Organization (WHO) leh the United Nations hnuaia naupang lam buaipuitute chuan Thawhlehni khan Afghanistan-ah zeng hri laka invenna beihpui an thlak tan a. Hei hi kum thum chhunga he hri laka an ram pum huapa beihpui an thlak hmasak ber a ni.
Taliban rorelna, Afghan public health ministry chuan Thawhtanni khan ni lo chhung polio vaccination campaign an kalpui tur thu leh naupang kum nga hnuai lamte hnenah pek a nih dawn thu a puang.
Kum thum liam ta chhung, Afghanistan-a thuneihna an chan hma khan Taliban hian UN kaihhnawiha invenna petute (vaccination team)-in in tin luta beihpui an thlak tur hi an thuneihna chin hmunah chuan an lo phal ngai lo a ni.
An pawl hian heng damdawi petu zingah hian Afghan sorkar emaw, khawthlang ram emaw tana enthlatu an inphum an ring thin a ni.
Hetianga Taliban-in an thuneihna china pek an khap avang hian kum thum kalta chhungin naupang maktaduai 3.3 vel chuan invenna hi an dawng lo tura ngaih a ni a. Tunah erawh ram pum an thunun tak avangin UN kaihhruainaa pek hi an phal ta a ni.