AIZAWL: Sialsuk Joint YMA buatsaih, ni hnih awh tur Sialsuk YMA Tuikhuaha Nghakuai chiah runpui chu nimin khan Fisheries Minister K. Lalrinliana’n a hawng.
Fisheries Minister chuan luidunga eizawng te leh Sangha khawitu ten hlawk zawka Sangha an man leh Zoram mipui ten luidung nungcha hnianghnar taka an hmuh theihna turin sorkarin hma a la thin tih a sawi a. Sialsuk joint YMA-in Sangha humhalha, khawi punga ruahmanna an siam chu lawmawm a tih thu sawiin, hei hi sorkar dan bawhchhe si lo leh sorkar phal loh hmanrua tel lova hlawk leh hlimawm takin Sangha leh luidung nungcha a man theih a ni tih a lantir bakah mipuite zirtirtu ni ngei se a duh thu a sawi.
K Lalrinliana chuan “Luidung nungchate hi Pathianin kan ei atana a ruat rualin kan intodelh theih nan Sangha note la ei thamlohte hi kan zuah hram hram a pawimawh” a ti a. Sialsuk Joint YMA-in tuikhuah siama uluk taka Sangha an khawi pung chu entawntlak a tih tuh sawiin, tuikhuah tihchangtlunna tur pawh sorkarin a rang thei ang bera a ngaihtuahsak tur thu a sawi bawk.
Bialtu MLA Prof. F. Lalnunmawia pawhin Nghakuai chiah runpui buatsaih a ni chu lawmawm a tih thu sawiin a buaipuitute leh nghakuai chiahtute zawng zawng duhsakna a hlan.
Nghakuai chiah runpui hi vawiin chawhma dar 10:30 atanga chhunzawm leh tur a ni a, tlai dar 4 thleng chiah theih a ni ang. Sialsuk YMA tuikhuaha Sanghate hi kum 2 chhung khawih loh an ni a, nghakuai chiah tum an tam avangin online-a in register na chu khar a ni a, a hmuna kala in register chawp a ngai tawh a ni.
Nghakuaia chiahtu ten an Sangha man an nei nghal zel thei a, a hmuna ei nghal duh tan pawh ruahmanna siam niin, hawn duh tan pawh vur chhawp a ni a. Nghakuai nei sa lo tan a hmunah lei tur a awm bawk.