India sorkar chuan firfiaka che thin pawl hrang hrang 42 lai a khap (ban) tih a puang.
Heng pawl a ban zingah hian Lashkar-e-Taiba leh Jaish-e-Mohammed pawh an tel a. Firfiaka chetna hrang hrangah inrawlhin ram pawn atangin pawikhawih tura India-a lut thinte an nih thu Lok Sabha rorel inkhawmah nimin khan tar lan a ni.
Union Minister of State for Home G Kishan Reddy chuan kum 2018 leh 2020 inkar khan Jammu & Kashmir-ah venhim hna thawktuten mi firfiak 635 an thah thu an sawi a. Hetih hun chhung hian he union territory-a firfiakte chetna thlengah civil mi 115 an thih thu a sawi bawk.
Kum thum liam ta chhung hian ram pilril lamah firfiak pathum thah an ni tih minister hian a sawi bawk.
“Sorkar hian pawl leh firfiak pawl 42 lai khapin First Schedule of the Unlawful Activities (Prevention) Act, 1967 hnuaiah firfiakah a puang a. India-a firfiaka chetna hi a tam ber chu ram pawn atanga tih a ni,” tiin ziaka zawhna a chhannaah a tar lang.