Aizawl: Lawngtlai district, Rulkual khuaa current line chhia siam a nih laia current kal thut avanga mi pathum thihna leh mi pahnihin hliam an tawrh phahna chungchangah mawhphurtuah ngaiin, Lalfakzuala, Junior Engineer (Contract), Lawngtlai Power Sub-Division, P&E chu suspend a ni.
Nimin khan Lalhmingliani Hmar, Engineer-in-Chief, P&E chuan Lalfakzuala suspend order hi a tichhuak a ni.
October 12, 2022 khan Rulkual atanga km 4 vela hlaah thing tluin power line vaw chatin, line chhiatna hi ramhnuai a nih avangin a siam that hna thawhpuiah P&E department hian khawtlang an pun a, an kaihhruaina hnuaiah Young Lai Association (YLA) nen hnatlangin power line chhia hi an siam a. Line chhia an siam mek laiin current kal thutin line siam hna thawk mek mi pangate chu current-in a man a. Current man zinga mi pathum – Lalramdinpuia, C Lalhmunmawia, Samuel Lalthianghlima leh Lalrinchhana te chu a hmunah an thi nghal a. Lalrinenga leh Lalnghawrliana ten hliam an tuar a ni.