Aizawl : Social Welfare Minister Dr. K. Beichhua chuan thawhlehni khan Tanhrila Saizahawla Tribal Art Centre-ah Eklavya Model Residential School (EMRS) State Level Sports Meet 2022 a hawng.
Sports Meet hawnna hi Zodingpuii IAS, Director, Social Welfare & Tribal Affairs in a kaihruai a ni.
Social Welfare Minister Dr K. Beichhua chuan hawnna inkhawmah thu sawiin, zirna chu hnam hnufual zawk ten hnam ropui leh changkang zawkte an el phakna a ni, tiin rilru leh taksa hrisel nei turin theihtawp chhuah turin a fuiha. EMRS naupangte chu school ah an luh tir satliah ni loin nakina ram hruaitu atan chher mek an ni tih hre reng turin a chah.
Mizoram chhim tawp leh khawchhak atanga kalkhawm zirlaite chu Sports Meet chuan infiamna ringawt ni loin hnam inpumkhat te, nakina Zoram hmasawnna atana thawhhona pawimawh zia zirtirtu atana hmang thiam tur leh thian tha siamna huna hmang nghal turin a chah bawk.
Mizorama Eklavya School te hi Social Welfare & Tribal Affairs Department kaltlangin Social Welfare Minister chairman na hnuaiah EMRS Society in a enkawl mek a, tun hnai khan zirlai thahnem tak Bangalore-ah Cultural Meet neiin zirlai 40 leh anmahni hruaitu zirtirtu panga an kal tir tawh bawk a ni.
State level Sports Meet-a a titha zual, zirlai 160 hi tun thla, November 17 atanga Guntur, Andhra Pradesh-a neih tur, National Level EMRS Sports Meet ah kal tir an ni leh bawk ang.
State EMRS Sports Meet 2002-ah hian Ngopa, Serchhip, Lunglei, Tipa, Chawngte leh Lawngtlai EMRS School zirlaite an inel dawn a ni.