India-ah kum 100 chung lam vote nei mi nuai 2.49 zet an awm tih Chief Election Commissioner Rajiv Kumar chuan Nilaini khan a sawi.
Kum 80 chung lam voter pawh vaibelchhe 1.80 chuang an awm bawk tih Pune, Maharashtra-a ram pum huapa voters’ list special summary revision neih tur puala bicycle rally a vai liamnaah Kumar chuan a sawi a ni.
Special summary revision kalpui turah hian Election Commission of India-in a tum lian tak pakhat chu khawpui liana vote nei thei chin ziah luh belh a ni.
Kumar chuan Indian voter-te dinhmun leh awmna inkarkik dan chu thil danglam tak a nih thu a sawi a, Himalaya tlangdunga a sang lai ber atanga chhim lam tuipui kam km 6,000 zet hrul thlengin, khawthlang lama thlaler leh khawchhak kila tlang khawkrawk hmun thlenga an awm thu a sawi.
“Kum 100 chuang voter nuai 2.49 kan nei tih sawi pawh hi a nuam a, heng mite hian mi an tiphurin anniho hian an dam chhungin vote an lo thlak tawh a ni,” a ti.
Kum 80 chung lam pawh vote vaibelchhe 1.80 an awm tih rally neih zawha thuthar lakhawmtuten an kawmnaah a sawi bawk.
CEC chuan India rama voter hmasa ber, Shyam Saran Negi-a, tun hnaia thi kha kum 106 a nih thu leh a thih hma ni thum lekah pawh postal ballot hmanga vote a la thlak thu a sawi.
Kumar-a hian summary revision chu kum tin neih thin a nih thu a sawi a, kumin bik erawh Pune atanga tanin khawpui lian zual hrutin, vote nei thei tawh si, la nei si lote ziah luh belh chu an thupui a nih thu a sawi.
“Kan ram khawi atang pawhin, tlangram a ni emaw, vaukam a ni emaw, kawr ruam a ni emaw, thlaler pawh ni se, khua leh tui chu voter a ni ang a, mipui rorelna tichak turin a hming ziak lut mai ni lovin vote a thlak dawn a ni,” tiin CEC chuan a sawi.
Kumar chuan khawpui lian voter-te leh thalaite inlana vote nei tura inziak luta vote thlak turin a sawm.
“Vote hmanga i chet chhuah hian mipui rorelna kalphung i tichak sawt a ni,” a ti.
“Khawpui lian thenkhat, a hming sawi lan rem lovahte hian vote thlak lo an awm teuh thin a, chuvang chuan khawpui lian zual bitum kan ni,” a ti.
Kumar-a hian bicycle rally hi Shiv Chhatrapati Sports Complex, Pune- Balewadi veng atangin a vai liam.
A hnua thuthar lakhawmtuten an kawmnaah khawpui lian zual tak tak thenkhatah vote tla a that tawk loh fo thu a sawi a; mahse, heng khawpuite pawh hi lawm taka vote thlak an tamna leh mipui rorelna tichaktu an nih a beisei tih a sawi.
“Thalaite zingah pawh hei bawk hi kan ngenna a ni a. WhatsApp-a an ngaihdan an sawi maiu ang bawkin vote thlakin an duh dan an tilang thei a ni,” a ti.
Kumar chuan special summary revision bultan nana Pune an thlan chhan chu ‘hriatna khawpui’ a nih vang leh he khawpuia thil thleng chu rang taka a darh thin vang a nih thu a sawi.
Pune pawh vote tla tlemna ve tho a nih thu pawh a hriat thu CEC chuan a sawi a. Kum 2019 inthlanpuiah khan Pune Lok Sabha bialah hian vote 49.84% chauh a tla a ni.