Aizawl : Congress Thalai chuan NHIDCL-in ram neitu dik takte hnenah ram hlutna (land value) pe thuai turin an phut.
An thuchhuahah, National Highway No. 6-na leh No. 306-naa 4 lane kawngpui NHDCIL tena an sial turah tun thlenga harsatna hrang hrang avanga hma la lak theih loh leh ram neitute hnenah zangnadawmna sem theih a la ni lo reng chu ram hmasawnna tur tih thuanawpnaah an ngai tih sawiin, “Ti khaw muang lo a tihfel ngaite tifel thuai tur leh kawngpui sial hna thawk tan thuai turin NHDCIL te kan phut takzet,” an ti.
Mizoram-in 4 lane kawng tha tak a neih theih nana central sorkar atanga ruahmanna an siam hi lawmawm hle mah se, Mizoram sorkarin dan hman tlak tawh loh hmanga ram neitute ram hlutna it emaw tih tur hi a vanduai thlak an tih thu an sawi a. Ram neitu dik tak ten kum tam tak rinawm takin chhiah an lo pek tawh avangin an ram hlutna hi an chanvo anih angin an hmuh ngei theihnana hmala turin thuneitute zawng zawng an ngen thu leh ram neitute’n an chanvo an hmuh ngei theihna’n theihtawp an chhuahpui zel dawn niin an sawi.
Congress sorkar lai khan Railway kalna turah zangnadawmna chungchangah a ram neitute’n buaina lian tham tawk loa tluang taka ram hlutna phut tawk an lak theih laiin, tun MNF sorkar hnuaiah erawh ram neitute’n buaina an tawk nasa hle niin an sawi bawk.