- Ruata
Royal Enfield Super Meteor 650 2022 EICMA-ah phochhuah a ni ta a. Tarlan tawh angin India ramah chuan a vawikhat nan tun thla ni 18 atanga neih tur Royal Enfield Rider Mania-ah phochhuah beisei a ni.
Super Meteor hi lei theih tur chuan nakum kumtir lamah tlangzarh fel theih beisei a ni. He bike thar tur hi a model lineup lamah chuan variant 2 – Standard leh Touring a awm dawn a. India ramah chuan a elpui tur ber nia lang chu Kawasaki Vulcan S a ni.
A khawl
An phochhuah tur thu kan sawi tum khan hei hi chu kan lo tarlang tawh a. Royal Enfield Super Meteor 650 hian 648cc, parallel twin-cylinder khawl, Continental GT leh Interceptor chhuak mek tein an neih ang a nei dawn a. He fuel injector hmang khawl hian 47PS power leh 52Nm torque a pechhuak thei a ni. Transmission lamah chuan 6-speed gearbox, slip-assist clutch hmang a nei dawn a ni.
Suspension, Braking, Tyres
He Royal Enfield 650cc bike thar hian 43mml USD forks leh dual rear shock absorber suspension unit a hma leh a hnungah a hmang a. Braking power lamah chuan Super Meteor hian a hmalamah 320mm disc leh a hnunglamah 300mm disc te a hmang a. Heng brake te hian dual-channel ABS (anti-lock braking system) an kengtel bawk a ni. A ke lamah chuan hmalamah 19-inch leh a hnunglamah 16-inch ke, CEAT Zoom Cruze tyre te a hmang a. A hmalamah 100/90 – 19 M/C 57H leh a hnunglamah 150/80 B16 M/C 71H tyre te a hmang a ni.
A len zawng
RE Super Meteor 650 hian 1500mm wheelbase a nei a, a dung, a vang leh san zawng hi a indawt dan hian 2260mm, 890mm leh 1155mm te a ni a. A seat san zawng hi 740mm niin a fuel tank-ah hian petrol litre 15.7 a leng a ni. Meteor 350 chhuak mek nena khaikhin chuan a seat san zawng hi 25mm-in a hniam zawk a ni. He cruiser thar hian khalh laia a ri pekchhuah, driving noise hi 76.3 dB (A) a ni a. He bike rih zawng hi 241kgs (with 90% fuel & oil) a ni.
Design leh kentel
Royal Enfield Super Meteor 650 hian Meteor 350 in a hman ang ‘J’ platform a hmang a. LED headlamp thar a bial a hmang a, teardrop fuel tank, retro-styled winged logo, wide handlebar, side panel thar, forward set foot pegs, a tail section thar hlak te a nei ang a. Taillamp, mirror, indicators leh instrument cluster bial te a nei a. A man to hoin silver finish alloy component a nei a, a man tlawm hoah chuan alloy with blacked-out treatment a hmang a ni.
Twin-pod semi-digital instrument console hi silver finish niin tripper navigation system a hmang a. A non-adjustable hand lever leh a hmalam brake master cylinder hi RE Meteor 350 atanga lak a ni a. Royal Enfield Super Meteor 650cc hian Royal Enfield bike-a a vawikhat nan cast aluminum, old-school rotary style switchgear a nei a ni. Scooped seat design thut nuam tak tur a nei a, lumbar support a nei bawk a ni.
Royal Enfield atangin cruiser chak tha tak leh mawi tak, changkang bawk si a lo chhuah leh ta a. Cruiser bike ngaina tute tan thu lawmawm tak a ni a, lei tum tan chuan la nghah hret a ngai dawn a ni.