Italy a league hmahruaitu ni mek Napoli in a zawna Serie A match 10 hnehna changin an kal zel a. Thawhlehni zanah Empoli 2-0 in an hneh.
Stadio Diego Armando Maradona a inkhelah league table chung bera awmte hian first half-ah goal an khung thei lo. Ball chang tam zawk nimahsela goal khung turin darkar khat chuang an nghah a ngai.
Minute 70-naah Victor Osimhen chuan penalty a hlawhchhuak a, hei hi substitute Hirving Lozano chuan goal-ah a khung.
Mexican forward Lozano hi dah luh a nih hnuah a tal hnawk hle a. Empoli defender Sebastiano Luperto chuan a foul avangin yellow card hmu nawnin hnawhchhuah a nih phah. Lozano hian hian Piotr Zielinski goal khung tur a siamsak leh bawk.
Napoli hi tun season-ah league-ah an la tlawm lova, kumtharah hmahruaitu niin kum bul an tan dawn tih a chiang tawh. An stadium hming chawi chhan Diego Maradona tel lova league title a vawikhatna atana la turin an dinhmun a tha rih hle.
AC Milan leh Cremonese te goal inpe lova an inhnehtawk avangin point 8 in an sang mek.
Coach Luciano Spalletti chuan squad an neih chhah chu fakin, “Kar laihawl inkhelah player thlak kual loh chuan tha taka khelh tluan a har thin. Inthlak kual a pawimawh a, zaninah pawh danglamna siamtu a ni.” a ti.