Deputy Chief Minister Tawnluia’n thalaite thiam thil tihpuna eizawnna tlinga siam chu tunlai khawvelah a pawimawha, hemi kawnga hmalatu, LESDE department pawh sorkarin a tuaihnum zel tih a sawi.
He thu nimina LESDE buatsaih ni thum awh tur, ‘PUM-2022, Innovation Competition & Exhibition Fair’ a hawnnaah dy. chief minister chuan a sawi a, “Miin a thiam thil hmanga ei a zawn theihna tur kawng zawnpui hi thil pawimawh leh tul a ni a, degree sang tak nei kher lo pawha eizawnna hlawk tak neih theihna kawng a nih avangin a tangkaiin a pawimawh tawlh tawlh,” a ti.
SEDP hnuaiah kuthnathawktute khaichhuahna leh intodelhna tur ruahman a nih thu leh skill training chu SEDP hlawhtlinna tura hmanraw pawimawh a nih thu a sawi bawk.
Tawnluia chuan LESDE-in tun hma aia awmze nei leh mumal zawka hma a lak chhoh zel thu sawiin, “World education summit-ah te hial lawmman an dawng thei,” a ti a. Mahni kutkawih hmanga kutthemthiamten an thil siamchhuah pholanna hun, ‘PUM’ tih hming an puttir chu a inhmeh hle tih a sawi bawk a ni.
Ni thum awh tur, PUM-2022, Innovation Competition & Exhibition Fair hi ITI-a zir mek te, zir chhuak tawh leh kut themthiamna lama tui leh thiamthil neite tana buatsaih niin, an thil siamchhuahte chu phochhuah a ni.
Inelna siam a ni bawk a, thuang hnih – Engineering leh Non-Engineering Group-ah then a ni a. Engineering-ah hian mi 25 telin Non-engineering-ah 39, a vaiin 64 an tel a ni.
Hawnna inkhawmah hian LESDE Minister Lalchhandama Ralte leh Commerce and Industries Development Board Vice Chaiman K.Laldawngliana, MLA te pawh an tel a ni.