Indonesian thliarkar pui ber, Java-a lirnghinga thi zingah naupang an tam hle tih chhanchhuah hna thawktute chuan an sawi a, thi hi mi 268 an tling ta bawk.
Naupang kum 14 mi, Aprizal Mulyadi chuan lir a nghin lai khan sikulah a awm thu leh ‘kan pindan a chim a, ka ke kha a chimin a delh avangin ka tang’ tih a sawi.
A thianpa, Zulfikar-a’n a la chhuak a; mahse, a thianpa hi a tan zui veleh avangin a thi.
Thuneitute chuan mi 1,000 chuang hliam tuar an awm tih an sawi.
Thawhlehnia National Disaster Mitigation Agency (BNPB)-in an puan hnuhnung berah chuan chin hriat loh mi 151 an la awm.
Chenna in 22,000 vel a chhia a, mi 58,000 chuang hmun hrang hranga awmna tur siamah an awm mek.
Magnitude 5.6-a na lirnghing hian Thawhtanni khan tlangram hi a sawi a, lei nasa taka minin West Java bula Cianjur leh a chhehvela khaw eng emaw zat khaw pumin a chhilh.
Thite hi bang leh in chung chimin a delhte an ni hlawm a. “Rang takin a lo thleng thut mai a ni,” tiin Aprizal chuan AFP news agency a hrilh.
National Search & Rescue Agency aiawhtu chuan thi zinga tam tak hi naupang leh thalai an nih thu a sawi.
“Chhun dar 1:00 a ni a, naupangte sikulah an la awm hlawm avangin thi tam tak hi naupang an ni,” tiin Henri Alfiandi chuan a sawi.
Lirnghing hi lei chhung km 10-a thuk atanga intan a ni a, a hnuah nghing nawn (aftershock) vawi tam thleng lehin in sak tha lo tak takte chu a chim nasa hle.
Cibereum khuaah chuan chhungkaw pakhat chuan an fapa upa ber, kum 28 mi chu in dang chimin a chhilh atanga lak chhuah tumin an bei.
Chhanchhuah hna thawktute pawhin pui mah se hnawk a tam em avangin an che rang thei lo.
“A delhtu in chhawng hnihna atangin kan lai tan a, mihring chu kan hmu,” tiin sipai hotu, Sergeant Payakun chuan BBC hnenah a sawi.
President Joko Widodo chuan Thawhlehni khan hmun kilkhawr taka awm chhiatna thlenna hmun hi tlawhin a tuartute nena an inkawm lai thlalak pawh tihchhuah a ni.
“Ka thupek chu a tuartu, thil chim kara la tangte him taka lak chhuah tum hmasak ber a ni,” a ti.
Chhanchhuah hna thawhnaah hian police leh chhanchhuah hna thawktu dang za tel an thawk a. President chuan zangnadawmna pek an nih tur thu a sawi.
Indonesia awmna lai hi Pacific Ocean-a tectonic plate che reng awmna a nih avangin lir a nghing zing hle.
Lirnghing leh tsunami na tak tak an lo tuar tawh a, kum 2018-a Sulawesi thliarkar a sawi tum phei kha chuan mi 2,000 chuang thi an awm.