Aizawl : PC party President Vanlalruata’n sorkar lai MNF leh eptu party Congress te sorkar leiba chungchanga an inhnialnaah mipuiin thu dik an hriat a tul tih sawiin, “Nausen piang hlim pawh huamin mi pakhatin Rs. 96,417.27 zel ba ang kan ni”, a ti.
Vanlalruata chuan India hmarchhak state zinga state te ber Sikkim dawta leiba ngah ber chu Mizoram a nih thu sawiin, Sikkim chuan bâ ngah hle angin lang mahse, hmasawnna ruhrel ṭha siam nan an hman bakah leiba rulh leh theihna tur infrastructure an neih phah thung niin a sawi a. Mizoram erawh chuan hmasawnna ruhrel rotling leh leiba rulh theihna tur lam a hawi lem loh avangin insawi thlamuan nana hman chi a ni lo niin a sawi.
Kuminah Mizoramah mihring nuai 12, 27,000 vel awm tura chhut a nih thu leh leiba zat tur awm chu Rs vbc 11,830.40 a nih tur thu PC party President chuan sawiin, “a lu nunga chhutin mi pakhatin Rs 96,417.27 zel ba ang kan ni dawn”, a ti.
Vanlalruata chuan Bu- dget bu-a a lan danin 2020-2021 kumah leiba BE: nuai 87,503.00 niin, RE: nuai 1,88,044.11 a ni a, 114.90% zetin a pung a, actual-ah nuai 1,59, 522.74 niin 82.33%-in a pung niin a sawi a. 2021-2022 ah BE: nuai 48,945. 82 leh RE: nuai 4,27,775. 82 niin actual erawh a la hriat loh a, 773.97%-in a pung niin a sawi.
PC party President chuan “Kum kal mekah BE: nuai 1,31,289.58 leh keima project chhinah: nuai 2,39,380.29 niin 82.33% a ni a. Sorkar kal mek dan thlirin kan leiba tur hi Rs. vbc 12,553.08 vel a nih ka ring” a ti.
Vanlalruata chuan “tunah hian leiba thangah kan âwk tawh a, nakumah inthlanpui kan hmachhawn dawn a, chuta sorkarna siamtu chu tu pawh ni se tun aṭanga leiba thang ata kan chhuah theih dan tur ngaihtuaha ruahmanna siam ve turin political party zawng zawng ka ngen a ni” a ti bawk.