Kum 2002 – October 2022 thlenga Kolasib district-a thisen 85096 endikah HIV hrik pai 1690 hmuh an ni

Kum 2002 atanga October 2022 thlenga Kolasib district-a thisen 85096 endikah HIV hrik pai 1690 hmuh an ni a, October 2022 chhunga thisen 580 endik zinga 7-in HIV hrik an pai.

YMA leh Mizoram State AIDS Control Societ (MSACS) te thawhdunnaa HIV/ AIDS do kawnga hmalakna Zoram harh rawh campaign-a nimina Kolasib-a hun hmannah HIV hrik pai hmuhchhuah chungchang hi Chief Medical Officer Dr. Lalawmpuia Chhangte-in a sawi a. Tunlaiin nun uluk loh vanga damlohna a tam thu sawiin, AIDS bakah BP sang, zunthlum leh stroke vanga damlo an tam thu a sawi a. Heng natna te hi mahni inthununna leh insumtheihna hmanga hneh theih a nih thu a sawi.

He hun hmanpuitu Tuirial bialtu MLA K. Laldawngliana pawhin thusawiin, HIV hrik pai tam lama Mizoramin dinhmun du- hawmlo tak a luah mek chu siamtha tura thanharh a hun takzet thu leh insiamtha tur chuan mimal tin an pawimawh thu a sawi a. HIV laka him tur chuan nun uluk leh thianghlim, mahni inthununtheihna leh thuawihna neih a pawimawh thu a sawi.

K. Laldawngliana chuan HIV hrik pai te chu enhranna tello leh thlahthlam lova, an mamawh ang enkawlna pek bakah nunphung pangai an zawh chhunzawm theihna tura beiseina siamsak a pawimawh thu a sawi a. Hemi kawngah hian khawtlangah pawh thawhhona tha a awm a tul thu a sawi bawk.

Kolasib-a Zoram harh rawh campaign-ah hian hla inphuahsiak lawmman sem niin, Lalzikpuii, Tumpui pakhatna leh C. Dartluanga, Kawnpui pahnihna niin, C. Laldinpuia, Tumpui pathumna a ni thung.

Leave a Reply

Your email address will not be published. Required fields are marked *

error: Content is protected !!