Aizawl : Mizoram University (MZU)-a Department of Horticulture, Aromatic and Medicinal Plants (HAMP)-in Biotech-KISAN project a kalpui mek a. He project hi sorkar laipuia Department of Biotechnology (DBT) atanga an hmuh a nih thu leh loneitute hmasawnna tur project a nih thu MZU thuchhuahin a tarlang.
MZU thuchhuahin a tarlan danin he project hi Aizawl, Champhai, Kolasib, Serchhip, Lawngtlai leh Lunglei district-a loneitute inzirna sikul (Krishi Vigyan Kendra) kaltlanga kalpui mek a ni a. DBT Biotech-KISAN project-ah hian loneitu leh mithiam (scientist) te thawkhovin, loneitute banphaka Science thiamna chhawpchhuahsaka, science laboratory leh thlawhhma thlunzawm chu an tum a ni.
Scientist-te chuan loneitute harsatna tawh thin hrang hrangte zirchiangin a chinfel dan an ngaihtuahpui thin dawn a. Tunlai thiamna hmanga thlawhhma lak dan changkang leh hlawk zawk inzirtir te bakah huan lo ram nei zau lo, a bikin hmeichhe kuthnathawktute chawikana thawhhona tha zawk siam te a tum a ni bawk.
He project hlawhtlinna tura hma la tur hian MZU-a HAMP Department chu ‘Hmunpui’ (Hub) atan thlan a ni a, Project Coordinator atan Prof. Rambir Singh, HAMP Department ruat a ni.
MZU thuchhuahin a tarlan danin he project kaltlang hian thlai (vegetable) leh hmuihmer lam chi (spice) thlanchhuah bik te hlawk zawka thar turin loneitute chin tir an ni ang a, MZU HAMP Department chu zirchianna hmun niin thlai thar, a that dan duhthusama vawn leh sawngbawlte, lei leh hralh dan kawng awlsam zawkte a ngaihtuah bawk ang.
HAMP Department-a khawl leh bungruate chu KVK atanga scientist-te leh loneitute tan hman theiha chhawpchhuah a ni ang a, KVK scientist-te pawh tunlai thiamna sang ber ber leh khawl changkang ber ber hmanga training pek thin tum a ni.