Tun NBA regular season a record nei tha ber ni mek, Eastern Conference hmahruaitu Boston Celtics chak tluanglai chu Chicago Bulls in an titawp a. 121-107 in an hneh.
United Center-ah tun season beisei anga la khel thei lo fo Bulls hian an mikhualte laka hnehna an chan avangin a zawna vawi li an tlawmna chu an titawp ve chiah a ni.
Bulls tan star player DeMar DeRozan chuan point 28 a score a. Inhliam avanga la inkhel mang lo Zach LaVine pawhin point 22 a score.
Celtics hi tun season-ah vawi 13 chak thei awmchhun an la ni a, mahse Bulls in Thawhlehni zing inkhelah an hneh hle. Patrick Williams chuan Bulls tan point 17 a thawh bawk a. Halftime-ah point 13 in hma an hruai a, third quarter-ah 21-ah kai chho hmanin quarter hnuhnung berah Celtics in nawrlet mahse an khingpuite an veng tluan thei.
LaVine chuan, “Hnehna pawimawh bik tak a ni. Tunhnaiah a zawnin kan tlawm a, anni an chak zawn rei thung. Team tha tak kan ni tih hi ka hria, mahse han khelh that loh lai kan neihin insiamthat mai kan harsat deuh thin a. Tihsual kan neih leh thin a pawi bawk. Hetiang te te hian inkhel hi a tidanglam zo thin.” tiin an tan Celtics hneh a pawimawhzia a sawi.
Celtics tan Jayson Tatum chuan point 28, rebound 11 leh assist 7 a nei a. Jaylen Brown chuan 25 a thawh.
Inkhel dangah NBA champion lai Golden State Warriors in Stephen Curry, Klay Thompson, Draymond Green leh Andrew Wiggins te an inkhelh loh tir zanah 128-83 in chiang takin an tlawm a. New Orleans Pelicans in an hneh.
Pelicans tan Brandon Ingram chuan point 34 score in Devonte Ingram chuan bench atangin 19 a thawh a. Warriors tan Jordan Poole chuan point 27 a score ve thung.