- Ruata
Maruti Suzuki chuan an lirthei hralh kal tak Eeco chu tuaitharin a chi thar an rawn tichhuak leh ta a. 1.2-litre K-series engine a hmang tawh dawn a, 1.2-litre G-series powerplant hlui chu a thlak ta a ni. Eeco hian kentel thar tha tak tak a nei bawk a, hetah hian Celerio leh S-Presso te neih ang digital instrument cluster leh engine immobiliser te a tel a. Tour V (fleet-only) chu Rs Nuai 5.10 man atanga awm tanin Eeco (fleet & private) chu Rs Nuai 5.13 atangin a man an chhiar tan bawk a, heng a man tarlan te hi ex-showroom man a ni.
Khawl thar
Maruti Suzuki chuan emissions regulation thar, khauh zawk – Real Driving Emissions (RDE) norms – hman a nih hmain an khawl ho hi an lo buatsaih char char a. Eeco in a hman thin 1.2-litre G-series engine pawh thlak niin, K-series thar zawk 1.2-litre DualJet khawl tha zawk 81hp power leh 104.4Nm torque pechhuak thei chu an hman tir ta a ni. CNG hmang bikah chuan a khawl hian 72hp power leh 95Nm torque a pe chhuak thung a ni. Transmission lamah chuan 5-speed manual a la hmang zel dawn bawk a ni.
Maruti Suzuki in an tarlan danin Eeco in petrol a heh zawng hi 19.71kmpl a ni a. Hetihlai hian S-CNG ho tui heh zawng chu 26.78kg/km a ni thung a, a hmaa a heh zawng hi 20.88kg/km a ni a, nasa takin tui a heh lo zawk dawn ta a ni. Tour V variant hi petrol khawla a tui heh zawng chu 20.20kpl niin CNG mode-ah chuan 27.05kg/km a ni thung bawk a ni.
Kentel thar
Eeco thar (updated) hian steering wheel thar leh digital instrument cluster thar a nei a. S-Presso leh Celerio te hman mek ang a hmang ve tawh a. A AC control te pawh hi rotary unit thar niin sliding unit te an thlak vek a ni. Hei bakah hian a hmaa a rawng pakhat Cerulean Blue chu Metallic Brisk Blue rawng tharin thlak a ni a. A chhung zau zawng, a cargo space hi litre 60 a ni tawh bawk a ni.
Maruti Suzuki Eeco elpuite
Eeco hi tun dinhmunah chuan bare-bones MPV a la ni a, eng variant-ah pawh power steering a la nei lo a. A elpui theih tura ngaih Renault Triber hi thutna tlar thum nei MPV awmchhun a ni a, hetiang man leh lenzawngah hian Eeco hnaih ber tu a ni a, mahse an thuam tha zawk a, a chhung a zau zawk bawk a ni.
Eeco hi India ramah kum 2001 khan Versa tih hming puin tihchhuah tan a ni a, chumi hnuah kum 2010 khan Eeco tih hmingpua thlakin a man intanna pawh an rawn tihniam hret a, tunah hian Eeco van hi nuai 9.75 lai an hralhchhuak tawh a ni.
Maruti Suzuki Eeco hi Mizoramah ngei pawh lirthei hralh kal leh hman tangkai em em a ni a. Sumdawng, mimal leh sorkar lirtheiah thleng pawhin nasa taka hman tangkai a ni a. Damlo phurhna atan leh khualzin phurhna atan te pawh tangkai taka hman a ni. Khawpui leh thingtlangah te pawh tangkai taka hman niin lirthei tangkai, man to bawk si lo a ni a. He lirthei, mi tam tak mamawh phuhrutu hi a chi thar, dual jet khawl tha leh tunlai zawk, tui heh bawk si lo neia Maruti Suzuki in an rawn tichhuak leh hi thu lawmawm tak a ni a. Leitu pawh a hmuh belh deuh deuh a rinawm a ni.