Parva III khuaah Bangladesh-a cheng Zohnahtlak mi 300 dawn raltlan an awm mek

Lawngtlai district chhung, Parva III khuaah Bangladesh-a cheng Zohnahtlak mi 300 dawn raltlan an awm mek a, khaw mipui zat aia tam mikhual an neih avangin khawtlang an talbuai hle.

Bangladesh sipai leh Arakan Army tangdunin Kuki Chin National Army (KNA)-te an beih rawn avangin Bangladesh ram chhung, Chittagong Hill Tracks-a cheng Mizo hnathlakten harsatna an tawk mek a, hemi avang hian an sahimna zawngin mi 300 vel chu Mizoramah tlan lutin Parva III khuaah an khawsa mek a ni.

The Zozam Times zawhna chhangin Parva III khawtlang hruaitute chuan an khaw chhunga cheng zat aia tam mikhual an neih avang hian an talbuai hle tih an sawi a, ei leh in chungchangah harsatna an tawk chho tan der tih an sawi.

Parva III khawtlang hruaitute chuan Lawngtlai district chhunga tlawmngai pawl leh kohhranten tanpuina pe mah se heng ei tur an dawnte hi ni hnih khat bak ei khawp a ni lo tih sawiin, “Tanpuina kan dawn belh a nih loh chuan ei leh in tur kan tlachham vat dawn,” a ti.

Raltlan zingah kum upa lam leh naupang zingah dam lo eng emaw zat an awm thu leh damlote chu a theih ang angin an enkawl a, damdawi tha pek tur pawh an nei tam lo tih an sawi.

Parva III khawtlang hruaitute chuan raltlante enkawl chungchanga sorkarin ruahmanna a siampui vat an ngai tawh a, tunah raltlan luh ber tur an awm tih thawm an hriat nen phei chuan khawtlang hruaitute pawh an mangang ru hle tawh tih an sawi bawk a ni.

Leave a Reply

error: Content is protected !!