Aizawl : MNF Adviser Lalruatkima chuan Mizoram leh Assam ramri chingfel turin chief minister Zoramthanga kaihhruai sorkar MNF chu a that ber thu a sawi.
Aizawl West Jt YMA Multipurpose Centre, Vaivakawna nimina Aizawl West II MNF Block Conference-a khuallian I&PR Minister Lalruatkima chuan tun hnaia Mizoram leh Assam sorkar palaite’n ramri chungchanga inbiakan an neih chungchang sawiin, Assam lam chuan ramri chungchang ziakin an la thlen ngai lo a, state pahnih karah politics level-a inbiakna pawh a la awm ngai lo niin an sawi tih a sawi a. “Keini lamin Bengal Eastern Frontier Regulation 1875 kan tan chhan a, anni’n an pawm lo thung. Amaherawhchu, chhiarpui nei tur leh inbiak chhunzawm turin kan inthlah a ni,” a ti.
Assam nena ramri chingfel turin Zoramthanga kaihhruai sorkar a tha ber tih sawiin, “Pu Zoramthanga hi inremna palai atan symbol a ni a, India sorkar pawhin a mamawh tak zet a ni. Vision thui tak neiin hma a la a. Thei nia inngai chuan kan ti hram zel a, thei lo nia inngaite chuan hmalak ngaihna an hre lo. Kan pu hi opposition ten nuih thin mah se, a kaihhruai sorkarah chuan Union budget-ah bamboo link road leh Bypass road tur a lo chhuak thei a ni. Hetiang hi a la awm ngai lo,” a ti bawk.
Aizawl West II MNF Block Conference hmanpuitu MNF Treasurer K. Vanlalauva pawhin thu sawiin, hnam sipaite inpekna thukzia leh tun dinhmun thlenga MNF-in hma a sawn zel thu te, lungrual taka thawkho zel turin kalkawmte a sawm a ni. Khual zahawm R. Thanglura, Dy Mayor pawhin AMC hmalakna pawimawh bakah bial mipuite thawhhona a that thu a sawi ve bawk a ni.