Aizawl: Aizawl City Local Council Association chu nimin khan Vanapa Hall-ah General Assembly vawi thumna an hmang a, he huna khuallian, Deputy Chief Minister Tawnluia chuan SEDP thawh hnihna sem a nih leh theih nan a dawngtuten hma an la em tih endik mek a nih thu sawi.
Tawnluia chuan Mizoram hmun hrang hrangah a thawh khatna sem mek a ni a, a thawh hnihna sem a nih leh theih nan a dawngtuten hma an la em tih endik mek a nih thu sawiin, a nih tur ang taka SEDP sumte hman a nih theih nan an huam chhung theuhah local council-ten lo vil se a duh thu a sawi a, sorkar kum tharah a dawngtu tur chhungkua thlan belh a ni ang a, a dawng tawh sate tan pawh dawn belh zel tur a la awm dawn a, SEDP hi a kal reng dawn tih a sawi bawk.
Deputy chief minister chuan local council member-te chu Aizawl khawpui inrelbawlnaa mipui hne hnai ber, a bulthut leh a lungphum pawimawh an nih angin tual chhungah hna an ngah a, khawtlang mipui tan an pawimawh em em tih sawiin, hei hi sorkar pawhin a hmuh hmaih loa a hriatpui tih a sawi.
State sorkar chuan thuneihna a hlawma hum lovin a zau thei ang bera semzai chu tha a ti a, khawpui hmasawnna sum leh pai dawnthlengah pawh municipality a hmang tih a sawi a, Lunglei lamah pawh Lunglei Municipal Council din tura ruahmanna siam fel vek tawh niin CEO leh a staff-te pawhin hna an zawm tawh tih leh tun hnaia cabinet meeting pawhin LMC inkaihhruaina tur a siamte a pawm tih a sawi bawk a ni.
ACLCA inkhawmpui hi an vice president, V.Lallungmuana’n a kaihhruai a, Aizawl Mayor Lalrinenga Sailo chuan thu a sawi bakah ACLCA ziaktuten an pawl hmalaknate an tar lang bawk a ni.