Kaphlei kutchhuak kimchang

  • Mahmuaka Chhakchhuak

Kaphleia Memorial Trust chuan kum hnih vel chhunga an buatsaih Kaphleia Kutchhuak Kimchang lehkhabu chu tlangzarh theih alo ni ta hi a lawmawm ngawt mai. Keini, Kaphleia chanchin pawh hre ve mumal lo a, a thuziah Thlirtu leh Chhingpuii avanga a hming lo hre ve chauh tan phei chuan a hlu lehzual a ni. Amah avang vek hian Tachhip hi khaw pawimawh tak a ni tih pawh kan lo hriat phah zel ta zel a, han zin nikhua pawh hian ngawi renga Tachhip khua paltlang chiah lo mah ila, kawngpui kama Tachhip Bazar awm chu ngawi renga pelh mai chu har deuh hian kan han hre lehzel hi amah Kaphleia hian hria sela min nuihzat loh vek chuan min chibai duh hialin ka ring. Kaphleia hi kum 1940 daih tawh, rambuai hma daihah khan lo boral tawh mahsela a chanchin hi sawi ala nuamin ala chakawm reng a, hei, tunah phei chuan a chanchin kan la hriat ngai loh tam tak te pawh kan lo hriat phah ta zel a nih hi. A mimal chanchin ngawr ngawr pawh hi ngaihnawm tham a ni satliah lo a, a bengvarthlak a, chumai bakah chuan a thuziak kan la hmuh ngai loh te pawh kan han hmu a, kan han chhiar leh tur hi Kaphleia Memorial Trust te thawhrimna vang liau liau a ni.

Nov. 12, 2022 (Inrinni) ah khan Central YMA Hall, Tuikhuahtlangah he Lehkhabu hi tlangzarh a ni a, a tlangzarhtu pawh hi Kaphleia kai tho lehtu an tih hial B. Lalthangliana a ni. Pu B-a hian kum tam tak kal tawhah khan Kaphleia chanchin hi alo buaipui tawh a, a thuziak mai bakah a Dairy te pawh alo kawl that khiau bawk avangin vawiinah hian mitin chhiar theih turin KMT-te chuan an lo buaipui theih phah ta a ni. Tichuan, KMT atangin F. Vanlalrochana’n an buaipui dan chanchin ngaihnawm takin a sawi bawk a, an lo thawkrim hle mai a, amah F. Vanlalrochana phei hi chuan Synod Archive Hall-a vawi tam lehkhabu a hai a, Kaphleia chanchin a buaipui dan hi ziak ta sela a ngaihnawm ngawtin a rinawm. Kum 1932 atanga 1939 thlenga Kaphleia Dairy chhu chhuak vek tu C. Vanlalauva hi a hming sawi rik ngei ngei ngai a ni bawk a, Pen hmanga ziak, kum 90 aia upa tawh chu chhiar a har tawh ngeiin a rinawm a, chung zawng zawng chu a ni hian uluk takin a dik thei ang ber turin a ziak chhuak leh vek a ni. Ka sawi sual loh chuan hmun thum velah chauh chhiar theih loh lai a neiin ka hria.

Tlangzarhna hmun hi a thleng hmasa pawlah ka tang a, hmun hrang hrang atangin mi an rawn kal zel a, thuziak lama thawhhlawk tak takte pawh an kim thawhkhat viau a ni. PL. Liandinga hmel hmuh hian a lungawithlak hrim hrim a, thangthar tana hmahruaitu a nihna hi sawi tur tam tak a awm. Opa Vanchiau pawh ka hrechiang telh telha ka ngaina telh telh a, a kianga awm hi a nuam a, a titi ngaihthlak hi manhla tak a ni. C. Lalnunchanga, Ruamrai Thuruk leh lehkhabu dang dang ziaktu nen pawh chiang taka kan inhmuh vawikhatna a ni bawk a, lawmawm ka ti ngawt a ni. (Zalian Thanga te hming chu lamri tawh kher lo teh ang, hun a uihawm) Anni bakah hian thu leh hla lama mi chhuanawm tak tak te, Tachhip lam atanga rawn kalte, MZU lam atanga rawn kalte leh Kaphleia te chhung hnai tak atanga rawn kal an awm bawk a, a number zawng chuan mi 50 vel emaw chauh kan ni nain kan kim hle a ni. Kaihruaitu pawhin zei takin a hruai a, thu sawi tur chauh a sawi a, tawngkam chuang bang a nei hauh lo a, a inthlahrun vang a ni kher lo ang chu maw. Tlangzarhtu leh KMT aiawha thusawitu kha chuan kha ai khan thu nei tam deuh mah sela ngaihthlak a hrehawm hauhin a rinawm loh, an thusawi a ngaihnawm a, a bengvarthlak hle a ni.

Kaphleia pual hian lehkhabu alo chhuak tawh thin a, C. Thuamluaia leh Kaphleia Hnuhma tih chu B. Lalthangliana’n alo buatsaih tawh a, kum 2010-ah khan Inte Thawveng tih bu chu KMT chuan an lo chhuah tawhin 2014-ah khan Khualzin Khawhar tih chu KMT buatsaihin an lo chhuah leh a, kum 2015-ah anni bawkin Hnahthel tih lehkhabu an lo chhuah tawh bawkin tunah Kaphleia Kutchhuak kimchang tih chu an buatsaih leh a ni. A bu dangte hi a tha lo e tihna ni kher loin tuna tihchhuah thar hi chu research ti duh tan leh Kaphleia chanchin chhui duh tan chuan a tha lawr lak a, a kimchang ber bawk a ni. Chuvang chuan inhnialna awm thei leh hrechiang lo tan he lehkhabu hi chhiar ngei chi a ni ang a, lehkhabu chhuara awm hrim hrim atan pawh neih ngei chi a ni ang. A bu hi paper tha chi (HNS niin ka hria) hman a nih avangin lehkhabu dang aiin a zang a, phek 417 laia chhah mah ni sela kut khingkhat pawhin a lek mai mai theih.

Opa Vanchiau hian Kaphleia Kutchhuak Kimchang buah hian thuhmahruai ziakin ‘Zofate zinga thu leh hlaa thangharh hmasa, kum 1910 – 1920 inkara piangte kha ‘First Generation Writers’ hming vuah a remchang viau mai. Chumi kum sawm inkara piang zingah chuan an vanglai em pawh thleng lo a mual liam ta mai, mahse thu leh hlaa hnam rohlu ni si Kaphleia (1910-1940), Lalzuithanga (1916-1950) leh Biakliana (1918-1941) te kha an langsar zual bik a. Anni bakah hian Nuchhungi (1914-2002), Novelist C. Khuma (1914-1990), Zirtirtu Lalhmuaka (1915-2002), Rev. Zairema (1917-2008) teho pawh seng luh a sual awm lo e tia a ziak hi keini zingah hian hnial tur tunge awm chuang ang le?

He Kaphleia Kutchhuak Kimchang lehkhabuah hian tunhma lama kan la hmuh ngai loh Kaphleia thuziak hmuh tur pakua lai a awm hi thil lawmawm ber a ni awm e. Tun hma lama kan lo chhiar tawh thin chu Thlirtu, Ui, Kurtai leh Chhingpuii te chauh hi a ni ang a tunah chuan a dang pakua te hi chu KMT te thawhrimna avanga kan hmuh theih a ni ti ila kan sawi sual kher awm lo e. Chung Kaphleia thuziak kan hmuh thar pakuate chu; Hriat a har, tih hi a awl a ni, T.K. Viala chanchin, Missionary haw tate – I, Missionary haw tate- II, Hriattirna, Mizo Zaipawl, Chhakchhuak Thlahtute, Mizo Zaipawl Zin thu leh Zawhna leh Chhanna te hi a ni. Chhiar chakawm tak tak a ni a, Thlirtu lo chhiar tawh tu tan chuan chhiar ngei ngei chi a niin chhiar manhla tak a nih ngei a rinawm.

Heng bakah hian Kaphleia Dairy mawlh hi chhiar a chakawm a, keini Dairy ziah ve ngawt ai chuan chhiar chakawm tak tur a ni. Kum 1932 leh kum 1939 chhungah hian Kaphleia hian thil tam tak a tawng a, a hmachhawn a, hnutchhiah bawk a ni. Chungte chu kimchang takin a ziak lo naa chuta tang chuan Kaphleia chu nang leh kei pawhin ka lo hriat chian theih lehzual phah thei bawk a, a lawmawm ngawt mai. Sik leh sa chungchang a ziak te, AZ. Phizo nena an inkar boruak ngaihbel theih tura a ziak te, a thuziak chi hrang hrang a ziak hun leh a ziak ni te, Calcutta-TB natna a neih tak dan leh Durtlanga Inte thawvenga a awmdan leh Tachhip lama a phei leh dan a ziakte, Assam Governor te nupa nena an inhmuh dan a ziakte hi han chhiar ve mah la Kaphleia hi mi na-mai a nih loh zia i hriat ngei a rinawm. Kum 30 chhung chauh khawvela hun a hman chhung hian sulhnu a lo hnutchhiah tam bik ziate hi kan han hre thar uai uai a, tluk loh rim alo nam zia kan hre chiang telh telh mai zawng a nihi hi. Kaphleia zawng hrin manhla tak alo ni ngei e.

Khawnge, thutna han siam rem ila, Kaphleia Kutchhuak Kimchang bu chhung lam chu han chhiar dawn tawh ila…..

Leave a Reply

Your email address will not be published. Required fields are marked *

error: Content is protected !!