Aizawl : Mizoram sorkara Planning & Programme Implementation department hnuaia Mizoram Startup Mission (MSUM) bultumin nimin khan National Startup Day Mizoram Edition hman a ni a. Mizoram sorkara Planning Secretary Lalmalsawma Pachuau-in a hmanpui.
DMC, Dawrpuia National Startup Day Mizoram Edition hmanna ah hian High School leh Higher Secondary School sawm bik te leh College hrang hranga Entrepreneurship Knowledge Cell student member te tan Startup Quiz leh Gamestorming te buatsaih a ni a. Mizorama Strartups leh Entrepreneurs ten an thil siam chhuah te pholangin, zirlaite nen an inkawm bawk.
Dr. Lalsangliani, Asst. Professor ICFAI University-in Awareness on Startup & it’s benefits chungchang leh India sorkarin mahni kutkawiha eizawng te tana scheme hrang hrang a duan te leh hamthatna awm thei te a sawi a. Mark Lalduhsaka, Partner, One Organic Partnership leh PB Lalrinfela, Founder, Tribeland Coffee ten anmahni kutkawih eizawnna bul an tan dan leh hemi kawnga harsatna tam tak an hmachhawn dan te sawiin, beidawng lova thawh tang tang leh teirei peih a pawimawh thu an sawi niin sorkar thuchhuahin a tarlang bawk a ni.