Aizawl: Aizawl East-II bialtu MLA Robert Romawia Royte chuan nimin khan Chite venga Aizawl Convention Centre sak mek a tlawh.
Minister Robert Romawia Royte hi hnathawktuten lo dawngsawngin kumin August thla chhunga zawh hman tum a nih thu an lo hrilh a. Ministry of Tourism-in Aizawl Convention Centre sakna atan sum pein, Wapcos Company-in a sak hna an thawk a, a sakna senso zawng zawng hi an tum vek dawn bawk a ni.
Sports Minister Robert Romawia Royte hian Aizawl Smart City Ltd hnuaia Chite Football Ground, artificial turf phahna tura hnathawh mek a tlawh bakah Chite bridge leh Bazar Haat hnathawh mekte a tlawh bawk.
Nimin vek khan sports department hnuaia Mizoram State Sports Council enkawla Armed Veng South Hall tihzauh hna thawh mekte a tlawh zawh hnuah, 1st M.A.P Ground, Armed Venga Astroturf phah leh hnathawh mekte a tlawh nghal a, phullem phah zawh tawh niin gallery leh field hnuai chei leh hnathawh mek chu zawh thuai beisei a ni a, hun rei lo teah hawn thuai tum a ni.