Italy a league hmahruaitu in table mawng phah a awm an ngam lova. Coppa Italia-ah league leh cup boruak a inang lo tih langin Cremonese kutah penalty shootout-ah Napoli an tlawm.
Thawhlehni zana Stadio Diego Armando Maradona a round of 16 inkhelah hun pangngaiah 2-2 in team pahnihte an inhnehtawk a. Penalty an pet hnuah Stanislav Lobotka chu pet goal lo awmchhun a ni a. 5-4 in Cremonese an chak.
Cremonese hi Serie A-ah tun season a chak la nei lo an ni a. Quarter-final lut turin penalty an pet goal vek a, Jose Mourinho team AS Roma an hmachhawn leh ang.
Hun pangngai a inkhelah Cremonese hi goal khung hmasa zawk an ni a. Napoli fans te barakhaihin minute 18-naah Charles Pickel chuan goal hmahruai a khung.
Mahse Napoli in an chhanglet har lo. Halftime hma in minute thum chhungin goal hnih an khung a. Juan Jesus leh Giovanni Simeone ten goal khungin chawlhlawk laiin hma an hruai.
Second half-ah pawh Napoli in inkhel an thunun zawk. Mahse minute 87-naah Felix Afena-Gyan chuan sang taka zuangin dinglam atanga ball vawrh luh chu kawh takin a tauh lut.
Extra-time-ah Leonardo Sernicola chu yellow card a hmuh nawn avangin hnawhchhuah a ni a. Napoli in tam zawk an nihna an hmang tangkai thei chuang lo.
Cremonese hi an chetchhiat avanga coach thlak an ni a, coach thar Davide Ballardini chuan ni hnih chiah club a la enkawl hman a, a inkhel hmachhawn hmasak berah a team a chakpui.
Hetihlai hian Napoli coach Luciano Spalletti erawh inkhel zawhah a lawm lo hle.
“Kan result avangin kan na a, pawi kan ti hle. Ball kan kawlin kan hmang tha tur a ni a, nidang kan tluk lo. Ball pet sual kan ngah a, chutihrual chuan chak thei erawh kan ni.” tiin an inkhel a thlirlet a, an tlawm chhan a sawifiah.