Australian Open champion lai Rafael Nadal-a’n a lallukhum a humhim thei dawn lova. Second round inkhelah inhliam avangin harsatna a nei a, inkhel tluan thovin ngai a awh lo tih a chiang a. Mackenzie McDonald lakah a tlawm.
Rod Laver Arena a inkhelah kum 36 mi Spanish star hi set khat leh break vawikhat a a hniam zawk laiin a kawngah harsatna a nei niin a lang a. Set hnihnaah medical timeout la in enkawl a ngai zui.
Inkhel erawh chhunzawm lehin a tawpah erawh 6-4 6-3 7-5 in a tlawm a. Kum 2016 hnua Australian Open atanga a tlak hma ber tum a ni.
Engtin zel nge?
Grand Slam title 23-na lak tumin a bei a, kumin a Grand Slam hmasa berah erawh a hlawhtling dawn lo. A tlak dan avang hian a hma lam hun chungchangah zawhna a awm nghal.
Nadal-a’n kum 2022 a hmang tha hle a, Melbourne Park a final-ah set hnih a hloh hnuah Daniil Medvedev a lehthal a. French Open-ah a vawi 14-na atan a champion a, record a siam bawk.
Nimahsela harsatna a tawk tel tho. Wimbledon quarter-final ah hliam a nei a, season tluanin he hliam avang hian a buai.
Australian Open first round inkhel a hmachhawn hma in a inkhel hnuhnung match sarih atangin vawikhat chiah a chak a. Tunhnaiah hliam in a tibuai fova, hei vang hian a hma hun chungchangah zawhna a awm ngun phah.
Inkhel zawhah Nadal chuan, “Inkhel thei lovin rei tak ka awm phah loh hram ka beisei. A hliam a dam hunchhung ringawt hi a ni lova, tennis tha taka khel leh tura inbuatsaihna hian hun a duh thin.”
“Ka tennis khelh chhungin vawi tam tak he kawng hi ka lo zawh tawh thin a, tih zel pawh ka inpeih, amaherawh chu he kawng hi a awlsam thin lo.” tiin a sawi.