Australian Open hmeichhe singles inelna a second round inkhel zingah ngaihven hlawh takah hmeichhe tennis a player beiseiawm pahnih an intawng a. Coco Gauff chuan Emma Raducanu a hneh.
British number one Emma Raducanu hi world rankings-ah 77-na a ni mek a. Kum 20 mi hi US Open champion ni tawh nimahsela inhliamin a tihbuai leh thin bakah beisei anga chet that tawk loh a nei leh thin.
Kumin Australian Open neih hma ni 13 a la awmin a inbuatsaihnaah a inhliam a, a inkhel tam thei lo. A khingpui kum 18 mi Gauff hi seeded number 7 nihna hauhtu a ni a. Nikum French Open final a khel tawh.
Inkhel hmuhnawmah a tawp lamah Raducanu a che tha a, nimahsela a inkhelh tam loh a lang a. 6-3 7-6 (7-4) in Gauff a chak ta zawk.
Gauff hi kuminah Melbourne Park a champion thei tura rin zingah a tel a. Hetihlai hian Raducanu hian kum 2021 US Open a champion hnuah Grand Slam tournament-ah round thumna a la pel leh lo.
“A tawp lamah khan talbuai lo turin ka infuih nasa, Emma kha a tawp lamah a kheltha hle.”
“Inkhel hmuhnawm tak a nih ngei ka ring. He inkhel hi nghakhleltu an tam a, chuvangin tha taka kan khel thei kha ka lawm hle.” tiin Gauff chuan a chak hnuah a sawi.