Liverpool Football Club in kum 2023-ah a vawikhatna atan hnehna an chang a. FA Cup fourth round inhlangkaiin Wolverhampton Wanderers chu 1-0 in an hneh.
Thawhlehni zanah FA Cup third round replay khelh a ni a. Molineux Stadium-ah Liverpool kalin an mamawh result ang an nei thei hram.
Harvey Elliot chu an chakna chhan niin English rawlthar beiseiawm hian inkhela goal awmchhun mawi takin first half-ah a khung a. Liverpool hian Brentford leh Brighton te league inkhela an hneh loh inkarah Wolves hi an mualah FA Cup third round-ah an draw tawh a. Replay an khelh a ngaih phah.
Kawl a eng tan
An khelmualah Wolves in beisei angin first half khel lo mahse second half-ah na takin Liverpool an nawr a, an khingpuite an bawr buai hneh hle.
Nimahsela Jurgen Klopp-a’n a team siksawi kual nasa mahse a tawp thleng an tang thei a. Team naupang tak a khelhtirten fiahna an paltlang.
January 29-ah Brighton nen fourth round-ah hian an inkhel leh ang.
Liverpool hian World Cup zawh hnuah a vawi thumna atan chauh hnehna an chang a. Vawi ruk inkhel hmachhawn tawhin Aston Villa leh Leicester City chiah an hneh.
Lehlamah Wolves in Julen Lopetegui hnuaiah hma an sawn hle tih an tilang a, goal hmaah erawh an vanduai.
Ruben Neves, Raul Jimenez leh Matheus Cunha ten chance tha an nei vek.
“Kum tam tak liamta ang mai a ni”
Liverpool manager Jurgen Klopp chuan inkhel zawhah tunhnaia an chet chhiat chungchang a sawi a. “Inkhel a hnehna kan chan a, tha taka kan khelh lohna hi a rei tawh a, kum tam tak liamta ang mai a ni.”
“A tawpah chak turin kan beih viau erawh a ngai thova, mahse inkhel hun tam zawk kha kan thunun. Kan inkhel a lungawithlak a, tunhnaia kan result te nen chuan kan tan thil tha tak a ni.” tiin a sawi.
“Man of the match thlang dawn ila thlan tur an awm nual. First half kan kheltha hle a, second half-ah pawh khelhthat lai tak kan nei. A tawpah goal venghim turin inpekna sang tak a ngai.” a ti bawk.
Wolves coach Lopetegui chuan, “Liverpool laka inkhelh hi a awlsam lo, mahse ka ngaihdanah chuan second half kan inkhel en kha chuan hei aia result tha hi kan phu in ka hria.” tiin a sawi.