Aizawl: Larsap Hari Babu Kambhampati chuan Mizoramah bank tan hmalakna tur a la tam thu Reserve Bank of India (RBI) hotute a hrilh.
RBI Office, Aizawl-a Officer-in-Charge P.Shimrah, Mizoram Rural Bank Chairman V.Jayachandra leh RBI officer dangten nimin khan larsap hi Raj Bhavan-ah an kawm a, he an inkawmnaah hian larsap chuan Mizoramah bank hmalakna tur a la tam thu hi a sawi a ni.
Larsap chuan mipui nawlpuiin welfare scheme, social security scheme, loan puk theih chungchang leh an bank account kaihhnawih banking services an dawn theih tur chungchang te chiang zawk a hriat an la mamawh tih a sawi a, “Bank hnathawk ten ta’n an lak chhunzawm a la ngai hle a ni,” a ti.
RBI hotute chuan February thla chawhmaa Financial Literacy Week (FLW) hman an tum dante Larsap chu hrilh in, FLW hawng tur leh a hawnna inkhawmah khuallian atan an sawm nghal a ni.
RBI hotuten report an pek dan chuan FLW hi February 13 atanga 17 thleng neih a ni dawn a, he hunah hian bank kaihnawih thil leh sum enkawlna chungchangah zirtirna ngawrh taka inpek tum a ni a. Sum leh bank account kaihhnawih a bumna chi hrang hrang lak a customer leh mipui nawlpui an lo him zawk dan tur chungchang pawh a zau thei ang bera inzirtir tum a ni.