Aizawl: Excise & Narcotics department-in nimin khan Phunchawng leh a chhehvel ramah dan kalha zu thlawr dap runpui an nei.
Excise & Narcotics department thuchhuahin a tarlan danin, zu thlawr dap runpuiah hian zu thlawrna hmun 30 chuang an tichhia a, zu thlawrsa leh zu thlawrna atana hman bungbel eng emaw zat a hmunah tichhiain an man bawk.
Excise thuchhuah chuan, henglai hmuna zu thlawr te chu zu thlawr dan pangngai lova thlawr a nih avangin mihring in atan a hlauhawm thu a tarlang a, heng zu te hi in lo turin mipuite an ngen.
Nimin vek, tlai dar 4 khan Excise force leh Assam Rifles te thawkdunin Ruantlang khaw bul, Farlui road, Champhai district-ah Heroin Hawng 50 leh a neitu nia puh mi pahnih – Vanlalrina (32), Khawmawi, Myanmar leh Vanlalsangliana (34), Venglai, Champhai-a khawsa nia inchhalte chu an man bawk.
Heroin vanga man te hi The Narcotics drugs & psychotropic substances act, 1985 (NDPS Act) tlawhchhana thubuai siamsak nghal niin, court-ah hruai nghal an ni.