National Students Union of India, Mizoram chuan an president RB Lalmalsawma hoin nimin khan Sialsuk PHC an tlawh a. Sialsuk PHC hi December 8, 2022-a hmanhmawh taka hawn ni tawh si vawiin thleng luah a la ni lo chu hriatthiam har an tih thu an sawi.
NSUI (Mz) hruaitute hian Sialsuk PHC sak thar hi NABARD sum hmanga Rs nuai 240 vel senga sak chu a building sak vel tha thawkhat viau mah se, tui leh eng la awm loh avangin luah luh theih a la ni lo thu leh building tharah hian inhnuai tanky atanga in chung tui pump chhohna khawp pawh an la neih loh thu thawktuten an lo hrilh niin an sawi.
NSUI (Mz) President RB Lalmalsawma hian Sialsuk PHC hman theih hmaa hawn a ni chu a hriatthiam loh thu a sawi a. Health Minister Dr. R. Lalthangliana’n Zo Fest a hman paha PHC hawn a hmanhmawh angin Sialsuk mipui tana hman thuai theiha puitlin ngei turin Mizoram sorkar ngenin building chunga damlo enkawlte wheel chair hmanga nawr theih loh tura step chauh an dah siam that an duh thu a sawi bawk.
NSUI (Mz)-in thuchhuah an siam danin Sialsuk PHC-ah hian thawktu pali awmin an indaih tawk velin lang mah se, ZMC atanga hmuitu doctor pakhat leh nurse pathum an awm mek a. Daktawr hi ZMC atanga Sialsuk kar khata ni thum tlawh tura kawptir a ni.