Aizawl: Mizoram Larsap Hari Babu Kambhampati chuan TB natna laka mipuite himna tura hmanlaknaah Mizoram state chu a ziaawm pawl ni mah se, tan lakna tur lai erawh a la awm tih a sawi.
Health department official te nena nimina Raj Bhavana an inkawmnaah Mizoram Larsap chuan, TB natna laka mipuite an himna tur leh he natna hri umbo tura Health department-a thawktute inpekna leh thawhrimna chu fakawm a tih thu a sawi a. An inkawmna hmasa leh tuna an inkawmna inkarah hmasawnna hmuh tur awm mah se, a bik takin damdawi ei that loh avanga TB natna enkawl dam theih loh vei an awm lohna turin tan lak mar pat a tul tih a sawi.
Mizoram larsap hian TB vei zingah AIDS/HIV vei leh mi harsa zawk te an awm tih a sawi a. He’ng mite hian TB damdawi an thatpuina turin ei tur tha (nutrition) an mamawh tih sawiin, TB vei te chhawmdawlna chu rawngbawlna pawimawh tak a nih avangin MLA zawng zawng te hnenah pawh lehkha hmangin ngenna a pe tawh tih a sawi bawk.
He inkawmanh hian Dr. T.Lalhmangaihi, Principal Director, H&FW, Dr. Lalfela, Nodal Officer, State TB Cell leh official dang te an tel a ni.