Mizoram cricket chanchina a tum thum nan India rama tualchhung inelna sang ber Ranji Trophy-ah Mizoram in hnehna an chang.
Narendra Modi Stadium, Ground B, Ahmedabad a inkhelah Mizoram in innings khat leh run 27 in Ningani khan Arunachal Pradesh hi an hneh.
Toss a vannei zawk Arunachal Pradesh in vuak hmasak an thlang a, over 87.2 ah run 199 siamin an out zo. Remruatdika Ralte, Bobby Zothansanga, Avinash Yadav leh Taruwar Kohli ten wicket hnih theuh an la.
Mizoram lam in vaw ve in an che tha hle a, Zothanzuala’n run 27 in bul a tan a, Taruwar Kohli (144) leh Joseph Lalthankhuma (73) te nghet taka an din hnu ah outstation player Avinash Yadav (125) leh tualchhung batsman Sumit Lama (74) te an che tha chhunzawm a. Mizoram hian run 485 an siam.
2nd innings ah Arunachal Pradesh hian theihtawp chhuah mahse run 259 ah an out zova. Mizoram 1st innings chu run 27 in an um phak tak loh avangin Mizoram an chak chiang hle.
Avinash Yadav-a’n wicket 6 a lak bakah Mizoram vice captain Bobby Zothansanga chuan wicket 3 a la ve bawk a. Arunachal Pradesh lam an che thei lo.
Mizoram hian tun season Ranji Trophy a an group a inkhel an hmachhawn tur an khel zova. Vawi ruk inkhel hmachhawnin vawi hnih an chak a, draw vawikhat neiin vawi thum an tlawm.