Tibet rama kawngpui liana awm leiverha vur tawlh thutin lirthei tam tak a chhilha thi chu mi 20 an tling ta a, mi pariat chin hriat lohvin an la awm mek bawk.
Chinese sorkar chanchinbuin Zirtawpnia thlalak a tihchhuahah chuan chhanchhuah hna thawktute chuan khawl nen vur chhah takin a khuh lirtheite hai chhuah tumin an bei mek a. Chhiatna thlenna lai hi Tibet chhimthlang lama Nyingchi leh Medog county inkalpawhna kawngpuia leiverh a ni.
Zirtawpni thleng khan mi 20 thi an awm tawh tih tihchian a ni tawh a, mi dang pariat chin hriat lohvin an la awm mek niin sorkar enkawl, Global Times chanchinbu chuan a tar lang.
Thawhlehni zan dar 8:00 (India-a tlai dar 5:30) pelh hnu deuhva vur tawlhah hian mi 53 chu hima lak chhuah an ni tawh niin Xinhua news agency chuan a tar lang a. A tawlhna lai tak hi Mainling county-a Pai khua leh Medog county-a Doxong La tunnel inkarah niin a tar lang a. Dama lak chhuah zinga panga chu an na hle nghe nghe.
Tual chhung mi pakhatin Global Times hnenah chhiatna thlen laia he kawng zawhtu tam zawk chu Tibetan an ni a, Pathianni atanga an hman tan tur, Lunar New Year mahni khuaa hmang tura zin an ni hlawm tih a sawi.
Chhanchhuah hna thawktute chuan leiverh luhka chiahah vur tawlh hian lirtheite chu a chhilh a, a chhilhtu vur hi a chhah hle tih sawiin lirthei khalhtute leh an mi phurhte chu an tang ta niin an sawi.
Nyingchi hi tuipui zawl atanga metre 3,040-a sanga awm a ni a, an khawpui, Lhasa atanga darkar nga tlan vel a ni a, chhiatna thlenna kawngpui hi kum 2018-a hawn kha a ni a. Thlasik lai chuan zanah phei chuan vur khang theihna khawpin a vawt thin a ni.
Chinese thuneitute chuan chhanchhuah hna thawktu mi 1,000 vel leh emergency-a hman tur lirthei eng emaw zat a hmunah hian an tirh thu an sawi.
“Vur hi mihring kawng thleng vela chhah a ni a, kawngpui hi a nal em em bawk a. Chhanchhuah hna thawktute pawh an tawlh zawt zawr reng a ni,” tiin tual chhung health centre-a thawk pakhat chuan Global Times a hrilh.
Himalaya tlangdungah hian vur tawlh thut ang chi hi thil thar a ni lem lo va. Nikum October pawh khan India hmar lam, Uttarakhand-a Mount Draupadi ka Danda II-a mountaineering expedition nei mek chu chhilhin mi 26 vel an thi a ni.