Border Security Force (BSF) chuan Pakistan lam atanga drone hmanga India-a ruihhlo tawlh ruk tum dang lehin Punjab-a Amritsar Sector-ah drone leh heroin kg 7 chuang an man.
Ram chhunga tih phal loh ruihhlote hi BSF sipaite chuan Nilaini leh Ningani zan khan an man chhuak.
“January 19/20, 2022 zan khan BSF sipaite chuan Pakistan lam atanga thil thlawk ri an hriat avangin an inralring vek a. Tin dah tur hmang, Standard Operating Procedure (SOP) awm sa angin agency dangte pawh hrilh nghal vek an ni,” tiin BSF thuchhuah chuan a tar lang.
BSF sipaite hian thil thlawkin eng emaw a thlak thawm an hria a. A tuk zingah thawm awmna lai bel dapa an chhuahnaah heroin ni ngeia hriat packet sarih an hmu ta a ni.
Ruihhlo an chharte hi kg 7.250 vel a nih thu BSF chuan an sawi a. BSF-te hi India leh Pakistan ramri, km 3,323 zet vengtu leh dan lova ruihhlo leh India pawisa lem thawn luh tum dangchat tura dah an ni.
“BSF sipai huaisen tak takte hian khaw awm dan uchuak tak karah pawh ramin a duh loh leh phal loh ruihhlo tawlh tumna a dangchat leh ta a. BSF hian ruihhlo do tur hian a bei zel dawn a ni,” tiin an thuchhuahah an tar lang.
India leh Pakistan ramri-ah hian ruihhlo tawlh a nasa a, pawisa lem pawh thenawm ram atanga lak luh a ni fo va; lawngchawlh hmunah pawh ruihhlo tam tham man a lo ni fo tawh.