Delhi Chief Minister Arvind Kejriwal chuan Assam-ah Aam Aadmi Party (AAP) chuan thuneihna a chang a nih phawt chuan a thlawna electric pek leh thalai zawng zawngte hna siamsak a tiam.
Pathianni khan Kejriwal chuan AAP-in Delhi-a kum sarih thuneihna a chan tawh chhungin a hmelhmang a thlak danglam vek tih a sawi a, “Assam-ah hian politics bawlhhlawh tak tih loh thil dang awm a awm lo,” tiin a sawi a. Hmarchhak state-ah hian Delhi-a thuneihna an chan ang chen chiah BJP-in thuneihna an chang ve tawh thung a ni.
AAP hian sorkarna an chelhna state pahnih, Delhi leh Punjab-ah chuan mipuite hnenah a thlawnin electric an pe a, hetiang bawk hian Assam-ah pawh thuneihna an chang a nih chuan an ti dawn tih Kejriwal chuan a sawi.
Hei bakah hian Assam-ah hian mipuiin AAP chu an thlang tling a nih phawt chuan thalai hna nei lo zawng zawngte hnenah hna an pe dawn tih a sawi a. Delhi-ah pawh kum sarih chhungin mi nuai 12 hnenah hna an siamsak tawh a, Punjab-ah pawh kum khat lek chhungin mi 28,000 hnenah hna an pe tawh tih a sawi bawk.
Kejriwal chuan an sorkar a nih phawt chuan state khawpui, Guwahati-ah chuan kum khat chhungin in tinah tui herh haw tur an pe nghal dawn tih a sawi bawk.
“AAP hian Delhi-ah kum 2015 atangin ro a rel tan a, Assam-ah hian BJP-in kum 2016 atangin sorkar an siam thung a. Vawiin hian Delhi hmelhmang chu kan thlak vek tawh. Himanta babu (Assam Chief Minister Himanta Biswa Sarma) hian kum sarih chhung hian eng nge a tih? Engmah a ti lo, politics bawlhhlawh chiah a awm a ni,” tiin a sawi a ni.