Chelsea chuan sum tam tak senga an lakluh an manager Graham Potter chu thla sarih chauh an chhawr hman tihin Pathianni zan khan an ban.
Blues hi Inrinni zan khan Aston Villa lakah 2-0 in an tlawm a. September 8 khan Stamford Bridge-ah hian Thomas Tuchel a thlak a, hemi atang hian match 31 a hnuaiah khelin heng zingah hian vawi 11 an tlawm.
Blues hian tun season-ah player thar lakluh nan Pound maktaduai 550 an hmang a, heti chung hian Premier League-ah 11-naah awm mekin a sang pali a awmte chu point 12 laiin an pha lo mek.
Chelsea chuan thuchhuah an siamah club neitu – Todd Boehly leh Behdad Eghbali te chuan, “Graham hi coach a nihna leh a mihring mihrinnaah pawh nasa takin zahna kan nei. A thil tihna reng rengah zahawm tak leh rintlak takin thil a ti thin a, hetiang kan kal a ngai ta pawh hi pawi kan ti.”
“Coach thar lakluh leh club in hmalam a panna kawngah pawh club nena thawhdun chhunzawm zel a remti.” tiin an sawi.
Chelsea-ah hian Potter-a’n Brighton a a lo thawhpui tawh, London lama a hruai Bruno Saltor chu interim head coach a ni rih ang.
Potter hian match 31 a enkawl atang vawi 12 hnehna a chanpui a, Premier League-ah chawhrualin point 1.27 hmu ang a ni a, Premier League a Chelsea inkhel match 20 chuang enkawl thei zingah Glen Hoddle nen an hniam ber.
Tun season-ah Premier League manager ban 13-na a ni chiah.
Foxes lamah pawh
Leicester City chuan kum li chhung an club lo enkawl tawh manager Brendan Rodgers chu Pathianni khan an ban ve bawk.
Foxes hi relegation zone-ah awm mekin league-ah match ruk atang vawi nga an tlawm tawh a. Inrinni zan khan Crystal Palace lakah 2-1 in an tlawm.
Kum 2019 February thla khan club hi enkawl tanin Foxes hi league-ah season hnih chhung pangana a nihpui bakah kum 2021 khan FA Cup a vawikhatna atan a chawipui bawk.
Kum 50 mi hian Leicester City hi match 204 enkawlin vawi 92 a chakpui a, draw vawi 42 an nei.
Club chairman Aiyawatt Srivaddhanaprabha chuan tunhnaia an result leh an inkhelh dan chu an beisei ang a nih loh em avangin thutlukna an siam ta a nih thu a sawi ve bawk.