- MC Lalthianghlima
Congress sorkar liam ta kha kan thlîr lêt chuan, tla thei mai turah an inngai hauh lova NLUP leh thil dang hmachhuan an nei nual bawk. An hotute phei kha chuan MLA bial 34 an neih sa bak, bial dang pawh an huphurhlo hlea, hûih fai deuh vek tur ang maiin an inngaiin, an insawi hial a nih kha. Nimahsela MLA kan han thlang ta a, rin phâk bak leh mumang ram pawha kan man loh khawpin an tlâkna a sânga, MLA 34 nei kha, under 10 ah an awma, an insawh sil hle a nih kha.
Tichuan, MNF sorkar thar a lo piang ve leh ta a, an ni pawh mipuiin kan rin phák bakin MLA an rawn ngah ta a. An thla a muangin nghet leh tha tâwkah an inngaia, matheilovin term hnih (2) kum sawm hi chu sorkar-na siam thei turah an ingai ni âwm takin a lang.
Congress vanglai ang deuh mai khan, MNF hotute pawh an zâmlo hmel viau. Tuna MLA an neih sa bâk, bial dang pawh la deuh vek tur ang maiin tawngkam an nei hial a nih kha.
Mahse, thil reng rengah hian mahni kan inngaih ang leh kan indah len âiin, mite min hmuh dan leh mite min ngaihdan hi a lo pawimawhin, kawngro a su daih zawk tih hi hriat reng tur a ni.
Khi’ng party pahnihte’n sorkar nghet tak anga lang an siama MLA pawh tam tak nei leh tla mai mai thei tawhlo tur anga an insawi hi, a dik tâwk loh zia kan hre tawha, kan la hre leh dawn ni pawhin a lang bawk.
He thu ziaktu ngaihdân emaw, a chhiartute ngaihdân hi a pawimawh berlo. Bible ringtu kan ni a, kan Bible-in engtin nge min hrilh tih leh engtinnge min hruai a tum tih hi kan ngaihtuahin, chumi mil chuan ngaihtuahna kan hmang mai tur a ni. Bible chuan “Ram chu Lalpa ta a ni a, hnam tin chunga rorêltu a ni” a ti a. Heta “Ram” a tih hi, mithiamte sawi danin sáptawnga “Kingdom” tih hi a ni âwm e.
Chu Lal ram (Kingdom) a rorêltu leh thuneitu ber chu kan Pathian hi a ni a, mi chapote leh a mah (Pathian) âia thil dang chhuang leh sum (Pawis) chakna rinchhantute chu, a paihin a hnàwl bawk. Chuvangin ram rorêltute pawh, mahni mihringpuite chunga tawngkam thlahdah tak tak hman chîngte leh chapo chu kan Pathian hian a paih fo va, “Saipui kal lai uitang rualin an bauh ding lovang” titu sorkar pawh an Lalthutthleng namthlukin a lo awm tawh a.
Vawiina kan sorkar hrawn mêk M.N.F party pawh hi, kumin 2023 MLA inthlanpui kan hmachhawn turah pawh hian kei chuan sorkar-na an siam chhunzawm ka ring tawh hauhlo. Engvangin maw? E le, kan Chief Minister (MNF party lu ber, an President) chuan sorkarna petu Pathian âiin sum (pawisa) chakna a rinchhan tlat tawh a. “Ram (Kingdom) chu Lalpa ta a ni” tih a theihnghilha. Kumin inthlan kan hmachhawn turah hian SASCI pawisa leh eng sum sum emaw pawhkhâwma, chu pawisa hmang chuan campaign beihpui thlâka sorkar chhunzawm an inrin thu a sawi a.
A sawi zêlnaah, party pakhat phei chu an party headquarters atangin an candidate-te hi nuaih 4/5 pêk tur an neih a rin loh thu leh, pûk chawpa an campaign tur thu a sawi tlat tawh a. Hei hi, chapona ze khat leh mahni mihringpuite hmuhsitna, an mahni siama Lalthutthlenga thut tirtu Pathian âia sum (pawisa) chakna thahrui a rin zâwk zia ti langtu a tih loh theih loh a ni.
Tin, he sorkar hnuaiah hian kan tlawmngai pâwl lian ber leh kan rama Kohhran lian berte chuan, kan rama eirûkna leh hlemhletna do an puang dum dum a. Ram mipui, rethei tak takte health care bill a tâng thuap bawka. Pawisa a vâng kan tih êm êm laiin, a tamna lamah chuan a tam leh viau zêl bawk site hian lu a ti haiin, mang a ti ang takzet a ni.
Engvangin nge M.N.F sorkar a tlâk dawn? kan tih chuan. An mahni siamtu (Sorkarna petu) Lal ram (Kingdom) neitu chakna âiin pawisa thiltihtheihna an hmachhuan tawh zawk vang a ni kan ti thei ang. Chuvangin “Ram neitu Pathian” hian a hnawl tawh rih niin a langa. Ram mipui hmangâi tak taktu, sum siamna atana politics hmang, inrinni bazar lûn tak ang maia politics hi bazarna hmun pakhata ngai talttute chu ram mipui pawh hian an hnâwl tawh rih niin a langa. Sorkar thar siam turin ram mipui pawh an inpuahchah ut ut tawh niin a lang .
Remna leh muanna thlazâr hnuaia kan awm hi a lawmawm, a thlamuan thlak e. Chu remna leh muanna hnuaia kan kalphung kan siam rem vat loh chuan, harsatna leh buaina lian zâwk hi kan la tawng lovang tih hi a sawi theih loh. Tûnhmaa state dang kan nuihzat êm êm Bihar pawh Nitish Kumar a rawn lang meuh chu kan nuih ngam meuh tawhlo. Pawan Kumar leh Delhi C.M Arvin Kejriwal ît ngawih ngawiha awm reng hi kan ning tawh, an ni pawhin an tih theih (Ram mipui hmangaih takzet leh ram economy châwikan) hi kan duh a ni. Chumi tithei tur chuan kan ram pawh buatsaihin a awm mêk niin a langa, he hun tha rawn inherchhuak tur hi mipui pawhin kan hai loh hram a pawimawh takzet a ni.