Mizoram Pradesh Youth Congress Committee (MPYCC) chuan an president, Laltawnliana hoin nimin khan Thingdawl leh Kolasib Rengtekawn-a Manipur buaina avanga raltlante awmna hmun an tlawh a, tanpuina an hlan.
Tanpuina hlannaah hian Laltawnliana chuan BJP-in hnam leh sakhaw hrang hrang betute inkarah inhuatna leh tharum thawhna politics nasa takin a khel a, chumi rah chhuah avang chuan Manipur-ah nasa takin thisen a luang tih sawiin, “Heti khawpa Manipur-a tual chhung buaina nasa a chhuah mek laia India ram prime minister berin ngawih a chuh tlat mai hian BJP kaihhruai NDA sorkarah hian India ram a him lohzia a tilang hle,” a ti.
Hindu rama India siam tumna kal zel chu danchah a ngai tih sawiin MPYCC presdient chuan, “BJP kaihhruai NDA zawmtute hi tute nge an nih kan hriat a hun tawh a ni,” tia sawiin, ZPM hotunu chuan BJP thawhpui an hnial loh thu a sawi chu lungchhiatthlak a tih thu leh an rilru tak tak ni lo se a duh takzet tih a sawi.
Congress party chuan India ramah sakhaw vuantute leh hnam hrang hrangte inkarah inlungrualna a zawng thin a, a zawng mek zel bawk tih a sawi a. Tun tum Manipur buainaah pawh All India Congress Committee chuan Fact Finding Team dinin Manipur an tlawh a, BJP sorkarin remna leh muanna bakah mipuiin nunphung pangngaia an nun leh theihna turin hma an la tawk lo tih an hmuhchhuah thu a sawi bawk.
MPYCC president chuan Zofate hi chhan hrang hrang vangin then ni mah se thisena inzawmna avangin intuamhlawm tlat zel tur an nih thu a sawi a. Zohnahthlak unaute insuihkhawm lehna tur kawng hi bumboh hle mah se, tun hun harsa an tawh angte hi unau an nih hlutzia tilangtu ni zel zawk se a duh thu a sawi.
MPYCC hian raltlante hnenah buhfai, dal, alu, neutrela, silpauline, gamchha, damdawi chi hrang hrang leh hman chawp tur toothbrush, toothpaste, sahbawn leh mamawh dang an hlan.
Congress Thalai thuchhuah chuan Thingdawl Polytechnic-ah Manipur buai avanga raltan hi mi 124 an awm mek a, Rengtekawn Community Hall-ah raltlan mi 123 awm mekin, Rengtekawn khaw mi fin eng emaw zat te nen mi 236 Rengtekawnah hian an awm mek a. An la pun zel a rin thu leh raltlante chhawmdawlna kawnga sorkar hmalakna chu duh khawp a la ni lo hle niin an tar lang.