Aizawl: Election Commission of India-a Senior Election Commissioner Dharmendra Sharma hoin nimin khan Mizoram inthlanpui lo awm tura inbuatsaihna hrang hrangte endikin district 11 atanga District Election Officer (DEO) leh Superintendent of Police (SP) te nen an thukhawm.
MINECO-a Secretariat Conference Hall-a thutkhawmah hian Sharma chuan ECI-in a duh ber chu inthlanna felfai leh thianghlim tak neih a nih thu a sawi a. Vote nei zawng zawngte vote thlak a duh thu sawiin, ralmuang taka mipuiten vote an thlak theih nana dan kenkawh kawnga hmalakte chu pawimawh hmasa a nih thu a sawi.
Sharma chuan EVM hmantlak chauh hmang tur leh polling station zawng zawngten vote thlakna tura tul an neih te, sum leh pai uchuak taka hman a nih loh nana hmalak a ngaih thu a sawi a. Mizoram chuan inthlanna felfai tak a neih thin thu sawiin, India rama state ralmuang ber a nih ang takin inthlanpui lo awm tur pawh thianghlim, felfai leh ralmuang tak neih a nih theih nan a hma la turin DEO leh SP te chu a chah.
DEO-te pawhin kum 2018 inthlanpuia an district dinhmun tlangpui leh kumin inthlanpui lo awm tura an hmalakna hrang hrang bakah harsatna an neihte an sawi a. An harsatna neihte chu ECI hotute pawhin sutkiansak an ngaihna laiah tanpui an tum thu an sawi rualin, an duhkhawp lohna lai leh hmalak ngai laite an lo hrilh bawk.
ECI atang hian Nitesh Vyas (Sr. DEC), Hirdesh Kumar (DEC), R.K. Gupta (DEC) bakah Senior Principal Secretaries, Under Secretary leh Director te an lo kal a ni.