Aizawl: Tunlai hian college hrang hrangte chuan admission an la tan a, Aizawl chhunga college thenkhatah chuan admission dil zirlai an thahnem hle.
The Zozam Times-in nimina Aizawl chhunga college thenkhat a tlawhnaah Pachhunga University College hotute chuan under graduate first semester admission diltu an thahnem thu an sawi a, seat an neih zat chu 900 a nih thu te, an college-a luh tuma dil mi 6,500 vel an awm thu an sawi.
PUC hotute chuan kuminah hian an college-a lut turte chu entrance exam leh HSSLC result-a an mark hmuh atangin an thlang tih te, entrance exam an buatsaiha tlingte tan admission an pe nghal zel tih leh vawiin hi entrance exam an buatsaih tawp ni a nih thu an sawi a. An college-a lut tur an thlan danah hian thawktuten quota an nei lo a, exam an buatsaiha inziak tlingte chauh an lak thu an sawi a ni.
Govt. Aizawl College hotute pawhin an college-a luh dil an tam thu te, seat 600 an neih thu te, admission chu online hmanga dil theih a ni a, tunah hian dilna 1,200 bawr vel an dawn tawh thu an sawi a, May 28 thleng admission a dil theih dawn a, a tukah dilna lutte chu an enfiah dawn tih a sawi a. Govt Aizawl College-ah hian kum tin admission dil an thahnem thin hle tih an sawi.
Govt T Romana College pawhin admission hi an hawng mek a, HSSLC second division-a pass-te chu an admit zel tih te, admission hi online leh offline hmangin a tih theih tih an sawi a. Seat 340 vel zirlai an admit thei dawn a, tunah hian zirlai 200 chu college-a lut turin an admit tawh tih college hotute chuan an sawi bawk.
Hetihlai hian Higher & Technical Education hotute chuan nimin khan Aizawl chhunga sorkar enkawl college principal-te ko khawmin zirlai admission an pek dan chungchang an sawipui.
Thudawn danin HTE hotute chuan nikum lama college hrang hrang an fiahnaah college thenkhatah chuan classroom-in a zawh tawk aia tam zirlai an awm thu te, chu chu zirnain a tawrh phah theih thu te an sawi a, college tin hotute chu an hmunhmain a zawh tawk chin naupang admit tura an duh thu te an hrilh a, quality education kalpui a nih theih nana hma la tura an duh thute an sawi a ni.