Kuno National Park, Madhya Pradesh-a cheetah note pahnih chu Ningani khan a thi leh a. Ni hnih chhungin tun hnaia piang thar pali zinga pathum chu an thi ta tih thuneituten an sawi.
March 24 khan cheetah nu, ‘Jwala’ tia a hming an sak chuan national park-ah no pali a nei a. Thawhlehni khan thla hniha upa a no pakhat chu a lo thi tawh a ni.
Kar hmasa khan Supreme Court chuan thla hnih pawh tling lo chhunga South Africa leh Namibia atanga cheetah lak luh pathum an thih chungchangah thurawn tichhuakin Madhya Pradesh atang hian an thenawm, Rajasthan-ah sawn turin a lo ti tawh.
“Thla hnih pawh tling lova pathum an thi hi a serious hle a. Mi thiamte leh chanchinbuah thu tam tak chhuakin ngaihdan pawh a tam a. Kuno hi cheetah tam tak tan a tha tawk lo niin a lang,” tiin court sang ber hian thutlukna a siam.
“Hmun khatah an tam lutuk a. Engvangin nge Rajasthan-ah an tan hmun dang zawn a nih loh? Rajasthan hi eptuparty rorelna vang chauhva hawi lo an nih chuan chutiang mai mai tur chu a ni lo vang,” bench chuan a ti.
March 27 khan cheetah nu, Sasha chu a kal tha lo vangin a thi a. April 23, Uday chu a thawkna fel tawk lo vangin a thi leh a, May 9 khan a nu bawk, Daksha chu a pain an rimnaa intihbuainaah a thi leh a ni.
Mi thiamte chuan Kuno National Park-a thi an tam hnuah hian thuneitute hnenah pahnih thum lek leka an awmna tur hung mai turin an rawn tawh nghe nghe.
South African wildlife expert Vincent van der Merwe chuan, “India-a awmtir thar leh tumnaah hian thla rei vak lo chhung chu thihna a tam thei a, hei hi cheetah-ten an ram chin siam an tumnaah leopard leh sakei dang nen an intibuai nasa thei a ni,” a ti.
An awmna tur bik hung loh chuan an awm ngai lohna awmtir tum hi a hlawhchham zel niin van der Merwe chuan a sawi a, “South Africa-ah vawi 15 tum a ni tawh a, a hlawhchham vek,” a ti.