Aizawl: MPCC General Secretary TT Zothansanga chuan Congress party manifesto pakhatna, ‘Tang Puihna’ hmangin Mizoram mipuite hi hnam taima leh rinawma siam an tum tih a sawi.
Nimin khan Congress party hian an pisa-ah political session an nei a. He huna thusawitu, TT Zothansanga chuan eizawnna nghelnghet neih tuma an thiamna hmang ngeia hma latu leh hma la mekte dinchhuah theihna turin an mamawhna zawna cheng nuai hnih emaw, a aia tam pawhin sorkarin a pui dawn tih a sawi a. Mipui ‘mamawh intawm’ – kawngte, electric power connection te, dah vawhna (cold storage) leh khawl lian (equipments & machines) te, water supply angah te phei hi chuan cheng vaibelchhe telin sorkar hi a che dawn tih a sawi.
TT Zothansanga hian Tang Puihna hmangin Mizoram mipuite hi hnam taima leh rinawma siam hi an tum tih sawiin, “Kan hnam nun siam thatna kawng kan zawh dik chuan kan hnam a ding chhuak ang. Thalai humsual dai tur lakah pawh hei hian nasa takin a dang thei dawn a. Kan ram mipui hi ‘hnathawk hnam, hnam taima’ tiin min hre tawh ang,” a ti.
Joseph Lalhimpuia, MPCC General Secretary pawhin thusawiin, zirna hi ram leh hnam dinchhuahna tur a nih avangin human resource-ah hian tan a ngai tih a sawi a. “Kum 1976 atang chauh khan MBSE kan nei a ni a. Tunah hian CBSE thlir chunga zirlaite pawhin UPSC hmachhawn tura hma thlir kan neih a ngai ta,” a ti.
MPCC GS chuan kum 2013 atang khan Lungleiin MZU Southern Campus a neih theih nan hma lak a nih thu leh kum 2019 khan din phalna pek an nih tawh thu te, Pachhunga Universoty College (PUC) pawh University puitlingah dinin Vice Chancellor senso belh bak chu hmunhma an neihin a tlin thu a sawi bawk.