Prime Minister Narendra Modi chuan a pisa kum kua a luah tling ta a, Congress chuan he mi pual hian Zirtawpni khan zawhna pakua an zawt.
Eptu party lian hian thil man sang, hna nei lo tam, lo neitute sum lak luh leh thil dang dangah Modi-a hi zawhna an pe a. Hei bakah hian a hun chhunga a intiam ang a tih loh tam tak avangin ngaihdam dil turin an phut bawk.
Congress hian sorkar chuan kum kua tlin champha hi ‘Maafi Diwas’ tia a hming vuah turin an ti.
Congress chief hlui, Rahul Gandhi khan Bharat Jodo Yatra a neih lai khan sorkar beihna hrang hrang hi a lo tar lang tawh hlawm a, hemi behchhan tho hian tun tuma zawhna pawh hi an siam tih party general secretary in-charge communications Jairam Ramesh chuan All India Congress Committee headquarters-a thuthar lakhawmtute a kawmnaah a sawi.
An hruaitu dang pahnih, Pawan Khera leh Supriya Shrinate te tawiawmnain Ramesh-ah hian booklet ‘Nau saal, Nau sawaal’ tih an tlangzarh a, Modi-a prime minister a nih kum kuana chiah niin party chuan zawhna pakua an zawt tih a sawi.
“Heng zawhna pakuaah hian prime minister hi ngawih a chuh loh ngei kan phut,” a ti.
Prime minister hnenah an zawhnate chu, “Engvangin nge India-ah hian thil man leh hna nei lo punna hi a san em em? Engvangin nge hausate an hausak belha retheite an retheih tawlh tawlh? Economy-a intluktlan lohna a zau telh telh laiin engvangin nge vantlang thilte hi Prime Minister Modi-a thiante hnenah hralh zel a nih?” tiin Ramesh chuan a sawi.
Lo neitute nen inrema farm law pathum hnuh kir a nih khan engvangin nge minimum support price chu dan ang taka kalpui a nih loh tih te; kum kua liam ta chhungin engvangin nge lo neitute sum lak luh a leta a pun loh tih te pawh a tel tih a sawi.
Sorkar chuan eirukna chu a pawmzamin a kawmngeih niin Ramesh chuan a sawi a, “Engvangin nge prime minister hian rim taka thawkte chu ‘a thian’ Adani hlawkpui tura LIC leh SBI dah tura a ngen?”a ti.
“Engvangin nge rukrute i tlan chhuahtir? Engvangin nge BJP rorelna state-a eirukna awmte i haidaia engvangin nge Indian-te tawrhna hi i en liam mai mai?” a ti.
Ram himna chungchangah pawh Ramesh chuan Congress-in zawhna an siam tih a sawi a, “Kum 2020-a China chungchanga intifel anga i awm laiin tun thlengin India ram an la luah si,” a ti a. Hemi chungchang sawi fiah turin an party chuan an ngen.
Engvangin nge inthlana chak theih nan ‘inhuatna politics’ a khelh tih leh khawtlangah ‘hlauhna’ tihnun thar leh a nih chhan sawi fiah turin a ti bawk.
“Engvangin nge hmeichhia, Dalit, SC, ST, OBC leh a tlem zawkten an tawrhnaah hian i ngawih tlat? Caste census neih phutnaah hian engati nge i ngawih tlat,” tiin Ramesh chuan a zawt.
Sorkar hi mipui rorelna leh thuneihna chungchangah zawhna a zawt bawk a. Kum kua liam ta chhungin danpui hlutna leh mipui rorelna chu a tlahniam telh telh tih a sawi.
Khera pawhin kum kua liam taa sorkarin a tiamte kha a tak hmuh tur a awm lo niin a sawi ve bawk.
“A chhanna kan phutah hian kum 900 liam ta kha min sawipui suh. Tute pawhin kum kua liam ta chhunga i tihte kha kan hre duh vek. Prime minister hian ni nga lo awm leh tur chhungin kum kua chhunga ram a phatsannaah hian ngaihdam a dil ngei kan phut a ni,” a ti.
Ramesh chuan, “Engvangin nge eptu party leh an hruaitute lakah phuba i lak thin? Engvangin nge mipui thlan sorkar pheh thluk nan sum thiltihtheihna i hman?” a ti.
Ramesh hian sorkar hian mi rethei, a mamawhtu te leh tribal-te dawm kanna tur scheme-te chu an puala sum dan tihtlem leh inkhuahkhirhna khirh tak avangin a tichak lo zo vek tih a sawi bawk.
“Covid-19 vangin mi nuai 40 chuang thi an awm laiin engvangin nge Modi-a sorkar hian an chhungte hnenah zangnadawmna a pek loh? Engvangin nge kut hnathawkten hmanhmawh taka an in an pan vut vut a ngaih phahna turin inkharkhip i puan thut? Eng mah an tana puihna ruahman a awm bawk si lo,” tiin a zawt.