Aizawl: South Tuipui bialtu, Minister Dr R. Lalthangliana’n Darzo Kai,Tuipui D-ah lei lian Rs nuai 9,200 sengin dawh a ni dawn tih leh lei dawhna tur bula vela mite tana compensation pek tur pawh DC office-ah a awm tawh tih a sawi.
He thu hi nimina South Vanlaiphai khuaa MNF South Block Political Leadership Training a hmanpuinaah a sawi a, Dr Thangtea chuan lei ropui tak dawh turin sorkar laipui hotute an dawr fo a, nasa taka an nawr hnuah a hlawhtling ta tih a sawi.
Lei dawhna tur lung chu thla lehah emaw chuan Chief Minister Zoramthanga emaw, central minister-in a phum dawn tih leh lei dawh turin ram a lak heka ram neitute zangnadawmna tur Rs. nuai 700 pawh DC office-ah a awm tawh thute a sawi a ni.
Minister Dr Thangte chuan lei tangkai dan tur sawiin Siaha/Lawngtlai district mipuiten Aizawl an panna tur a nih thu te, truck lian ke 14 nei pawh an insul pek zur zur thei dawn tiin, tender pawh an chhuah tawh thu leh June thlaah chuan a thawktu tur contractor hming pawh hriat theih a nih tawh tur thu a sawi.
Political leadership training hi South Block President C.Lalrimawia’n a kaihruai a, MNF general headquarters hruaitu thenkhatin hmanpuiin thu an sawi bawk a ni.