Aizawl: Election Commission of India atanga lo kal, Dharmendra Sharma, Senior Election Commissioner leh a hoten Mizoram inthlanpui lo awm tura sorkar laipui hnuaia agency-te inbuatsaihna hrang hrangte an enfiah.
Secretariat Conference Hall, MINECO-ah thutkhawmah hian Sharma chuan ECI-in a duh ber chu inthlanna felfai leh thianghlim tak neih a nih thu a sawi a. Mipuiten ralmuang taka vote an thlak theih nan dan kenkawh kawnga hmalakte chu pawimawh hmasa a ni tiin, sorkar laipui aiawha inthlana duty tur zawng zawngte chu englai pawha an inring reng a tul tih a sawi.
Inthlanpui neihnaah ruihhlo leh pawisa a hluar nasa thin chu veiawm a tih thu sawiin Sharma chuan he lam a tan lak thar a tul tih a sawi a. Central government agenvy-te chu lungrual taka thawk tlang tura chahin harsatna an neihte pawh ECI a thlen hreh lo turin a hrilh.
Sorkar laipui hnuaia agency-te hian Mizoramah inthlanpui felfai taka awm theih nana an hmalak tawhna hrang hrangte bakah harsatna an tawh mekte pawh ECI hotute an lo hrilh bawk.
ECI atang hian Sharma bakah Nitesh Vyas (Sr. DEC), Hirdesh Kumar (DEC), R.K. Gupta (DEC) bakah Senior Principal Secretaries, Under Secretary leh Director te an lo kal a ni.