Health & Family welfare hnuaia Food & Drugs Administration chuan tunlai hian state pawn atanga sangha lak luh zinga chi khat, Rohu-ah khawnvartui rim a nam tih report an dawn avangin sangha zuarte chu hetiang sangha zuar tawh lo turin an ngen.
The Zozam Times zawhna chhanga FDA hotuten an sawi danin, sangha chi khat, Rohu chu chhum a nih hnuah khawnvartui rim a nam thu hmun hrang hrang atangin report an dawng a, chumi bawhzui chuan Aizawl chhunga sangha zawrhna hmuna mite endik turin sample an la.
Rohu sangha chu mihring ei tana him lo thei nia a lan avangin FDA hian sangha zuar association-te chu zuar chhuak tawh lo turin an ngen a, state pawn atanga Mizorama rohu thawn luttu hnam dang sumdawng thenkhat pawh bepawp tawhin Rohu chu la kir vek turin an ngen tawh bawk a ni.
FDA hotute chuan Rohu-ah khawnvartui rim a nam chhan chu an zirchiang mek a, sorkar laipui lama Food & Drugs hotute pawh an be rawn tawh a, sample thawnna tura an kawhhmuh, Kolkata-a laboratory erawhin sanghaa khawnvartui rim nan chungchang an la buaipui loh thute an lo hrilh tih an sawi.
Chutihrualin sanghaa khawnvartui rim a nam chu ei atana him lo a nih theih avangin endik ngei tuma hma an lak mek thu an sawi a, tun dinhmunah chuan Rohu chu ei loh a him ber rih tih an sawi bawk.