Aizawl: AMC Corporator Chuauzikpuii chuan ‘Mizoram chu a chhe vek tawh’ tih lam hawi a thuziak chhiar tur a tam tih a sawi a. Mahni chauh dik, tha leh fel intia mi dangte felna leh thatna lai hmu duh ngai hauh lo an awm a, hetiang hi rorelna la chelh ve ngai hauh lo lamtangten an hrat zual hle tih a sawi.
Mizo Hnam Run-a nimina chhung inkhawmah thu sawiin Chuauzikpuii chuan, mihringah pawh mahni chauh dik, tha leh fel inti; mi dangte felna leh thatna lai reng reng hmu duh ngai hauh lo an awm ang hian party politics-ah pawh mahni telna party ni lo tawh phawt chu sorkar hmalakna reng rengah an hmingthat bik hlauvin a thatna lai hmuh tum reng reng lo, doa sawisel nghal ringawta ram tang hi an awm tlat tih sawiin, “Hetiang hi rorelna la chelh ve ngai hauh lo lamtangten an hrat zual hle a ni,” a ti.
Chuauzikpuii chuan, “Mizoram chhe ta veka chhuah rengtute hian a eng lai tak hi nge chhe ta veka an sawi chu ni ta ang? Khawi maw lai karah duhthusam ang thlap thlap chuan thil a kal vek lo pawh a ni ang. Amaherawhchu, thawka phita MNF sorkar hnuaiah Mizoram chu chhan tlak awm tawh lo khawpa sawi thintute hian eng hmuhin nge kan ram hi an hmuh tih hi ngaihtuah tham a awm a ni,” tia sawiin, party thenkhatin sorkar hmalakna leh hnathawhte hmu duh hauh loin Zoram a chhiat vek thu ringawt an tlangaupui hi sim a tha hle nia a hriat thu a sawi.
MNF sorkarin theihtawpin hmasawnna kawngah tan a la nasa a, hma pawh a la chhunzawm zel dawn tih a sawi a. Congress sorkara gas leh buhfai a harsa em em thin kha tunah chuan kawtkaiah gas hnianghnar zawkin a pe a. Kawngpui chhe zualpui siam that a ni a, tuna a chhe lai an tihte pawh hi siam that tura hmalak mek a nih vang tih sawiin, “Chief minister, minister leh MLA-te hi an thuthluang mai mai lo tih a lang chiang hle a ni,” a ti.