UCL khel turin Man Utd tan Chelsea hneh a tawk; 4-1 in an chak

Ninga zana EPL inkhel awmchhunah Manchester United chuan Old Trafford-a an mikhual Chelsea chu 4-1 in an sawp a, United hi champions league khel turin an tling. United in hun hlimawm an tawn laiin Chelsea in hun chhe tak an tawng a, EPL 2022-23 season chu an elpui club lian lakah chak nei miah lovin an hmang ral.

Champions League khel phak chiang tura point khat mamawh United hian an mikhual United hneh ngei tumin tan an khawh a, an mualah an chetha viau nghe nghe. Chelsea lakah awlsam taka hnehna chang a, pathumnaa an kir leh rual hian chanchin lawmawm lo in a tlakbuak ve tho a. An forward Antony chu hliam vangin zawnchhuah a ni.

United hian an mualah goal an chhuah hmasa teuh hle a. Chelsea in goal thun theihna hun tha an neih chu ho lam taka an hlah vangin an him hlauh. Goal an chhuah thelh hnu hian an insiamtha thuai a, goal an thun zui ta vat bawk. Inkhel tan atanga minute 6-na lekah midfielder Casemiro chuan Christian Eriksen siamsak chu chiang zetin a tauh goal a, hmahruaian goal a thun. An mualah goal thun hmasa zawk an tang hian inrintawkna sang zawk United a pe a, an mualah phur takin an inlan zui theih phah.

Goal an chhuah hnuin Chelsea an khel tha zui viau a, goal thun theihna hun tha tak insiamchhuah mah se an hloh zawn tlat thung. Kai Havertz chuan uiawm takin a tauh goal lova, hemi hnu hian Conor Gallagher chuan a pet goal teuh viau bawk. Derthawng zawkah tang mah se United in chawlhlawk hmain goal dang an thun belh leh. Minute 45+6-ah fuh zetin an khingpuite an nawr tlang a. Jadon Sancho siamsak tha tak chu Anthony Martial chuan awlsam takin a pet goal a, an goal hnihna a thun a, si hnih faia hmahruaiin chawlhlawk an hmang.

Chawlhlawk hnu lamah United an khel tha chhunzawm a, goal hnih an thun belh leh. Minute 73-naah Bruno Fernandes chuan penalty atangin an goal thumna a thun a. Minute 78-na lekah Marcus Rashford chuan an goal lina a thun zui leh a, an hmahruaina a tizau leh zual. Si li fai ngawta hma an hruai tawh vangin chak zawk tur a chiang viau tawh a, United chu UCL khel turin an tling chiang tawh angin a ngaih theih nghal.

Si li ngawt an phurh hnuin an mualpho lutuk tur khuh mawi nan Chelsea in goal an thun ve ta nge nge a. Minute 98-naah Joa Felix chuan Ziyech siamsak atangin an goal neih chhun a thun. Felix goal thun hnu hian goal dang luh belh lovin inkhel a tawp zui a, Chelsea chu United lakah an tlawm leh ta nge nge a ni. Season kal mekah London club lian Chelsea hi an che tha lo viau a. An elpui lian Manchester City, Arsenal, Manchester United, Liverpool leh Tottenham te lakah an chak miah lo. Bazar nan sum seng hnem viau mah se season tawp nan khelh khat chauh a awm thlengin 12-naah an awm mek a ni.

Team lian Chelsea lakah awlsam taka hnehna an chan vangin EPL-ah champions league khelh tuma inelna a tawp zui nghal a. Manchester City, Arsenal, United leh Newcastle ten UCL an khel ang a. Liverpool leh Brighton in Europa League an khel ve thung ang. Old Trafford-a point thum hlu tak an hmuh hmangin United hi pathumnaah an inhlangkai a. Pathumna ni chungin season khar ngei an tum ang.

EPL hmawrbawk a ni dawn

English Premier League 2022-23 chu Pathianni zan khian a hmawrbawk a ni dawn ta. Pathianni zan dar 9:00 ah club 20 ten inkhel an hmachhawn dawn. EPL-ah hian Europa league khel tur thlengin tihchia a ni tawh a. Europa League khel tur leh EPL atanga tlahniam tur Pathianni zan hian chinfel a ni ang.

Table-ah pa 7-naa awm mek Aston Villa leh pa 8-naa awm mek Tottenham ten Europa Conference League khelh an inchuh dawn. Villa leh Spurs te hi point khat chiahin an inthlau a, goal diference-ah an intluk mek.

Villa hian Europa League khel tur Brighton chu Villa Park-ah an mikhual dawn a, Europa League khel turin an mualah chak an mamawh. An mikhual tur Brighton tan hian an chunga awm Liverpool lehpelh theih a ni tawh chuang lova, Villa an hmachhawn tur hi an tan awmzia a awm tawh lem lo. Heti a nih vang hian Villa tan chak theihna hun tha a inhawng a ngaih a ni.

Tottenham hian tlakhniam pumpelh tuma thih thah tak meuh meuha tan khawh tur Leeds United an hmachhawn dawn a, Elland Road-ah an tan chak a awlsam dawn lo. Leeds tan hian EPL khelh zui beisei turin chak ngei ngei a ngai a. An mualah chak ngei ngei tumin thapui an thawh ang. An mikhual Tottenham an hneh a nih chuan Leeds hian an chunga awm Leicester City leh Everton an lehpel thei dawn a. An mualah an chak a nih pawhin Everton leh Leicester result-ah an innghat tel thung ang.

EPL atang hian Southampton an tlahniam chiang tawh a. Leeds United, Leicester City leh Everton te zinga pahnih hi an tlahniam leh dawn a. An ni club pathum ten him tuma thapui an thawh tur hi EPL hmawrbawkna tihmuhnawm zualtur a ni ngei ang. Anni pathum hi an muala inlan tur an ni vek bawk, chu chu an inelna tingaihnawm lehzualtu a tling dawn bawk a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427