Aizawl: BJP Mizoram President Vanlalhmuaka’n Mizoramin state dangte rinchhan lo mahni kea dinga ei leh bara intodelh a mamawh ber tih a sawi.
Nimin khan BJP Mizoram hian an pisa-ah chawlhkar thar inhlanna hun leh Political session an hmang a. He hunah Vanlalhmuaka chuan thu sawiin Mizoram-in economic independence a mamawh tih sawiin, “Political Independence chu India ramin British lak atangin kum 1947-ah kan hmu tawh a, vawiinah hian ei leh bara intodelh a, state dangte rinchhan ngai lo va, mahni kea din theih hi kan mamawh ber a ni,” a ti a. Sorkar hrawn mekte hian ei leh bara intodelh hi an buaipui ngai lo va, Mizoram economy chu nasa takin a chhia tih a sawi.
Vanlalhmuaka hian BJP sorkarin mi retheiten mahni kea an din theihna turin hma nasa takin a la a, tunah chuan India ram chu khawvel ram hausa ‘economy lian’ ber pangana (5-na) a ni tawh tih a sawi a. Mizoram pawh retheihna lak atan chhanchhuak turin BJP a sorkar a ngai tih a sawi. A chhanchu Mizoramah PMAY kaltlanga mi rethei in sakna tur sum pawh central atanga a vaia hmuh a nih tawh laia, zaa 40 bawr Mizoram sorkarin mi retheite in sak nana an hman laiin, state dangten PMAY kaltlanga mi retheite in an sak zaah za an hmang tawh a, sum awm reng si a hun tiam chhunga hma la thei lo sorkar hrawn ringawt te hi Mizoram mipuite hian an hnawl ngam a ngai tih a sawi.
Inkhawm hi Johny Lalthanpuia, State Media Convener-in inkhawm a kaihruai a ni.