Aizawl : Nimin khan Parish Hall, Venglai, Kolasib-ah Green India Mission hnuaia kuthnathawktu ten ram ngaw an siam belhna tur leh sum a chantir theih thing phun belh kawnga hmal- akna tur ‘Agro-Forestry leh Social-Forestry’ hnuaia hamthatna awm te sem chhuah a ni.
He hun hi Forest Minister TJ Lalnuntluanga leh Tuirial bialtu MLA K. Laldawngliana ten an telpui a. Forest Minister chuan khawvel thang zel avanga khawsak leh eizawnna avangtein ram ngaw leh a chhunga nungchate nek chepna leh sik leh sa inthlakthleng buai nasa lutuk tur ven nan Green India Mission hnuaiah ramngaw awmsa humhalh leh siam belhna tur a ‘Agro-Forestry leh Social-Forestry’ kaltlang a hma la turin Kolasib district-ah mi 237 hamthatna dawng tur an awm chu sawiin lawmawm a tih thu a sawi.
TJ Lalnuntluanga chuan “Khawvel hi chenna tlak a siam tur chuan ram ngaw, tui hna leh ramsa humhalh a pawimawh thu leh heng te hi mi tin mawhphurhna a ni” a ti a. Ram leilung hausakna humhalh chu tun hma atang tawha ngaih pawimawh a nih thu te, dan mumal tak hnuaia ram ngaw leh nungchate pawh humhalh a nih thu leh leilung hausakna hlut thiam tura inzirtitnate pawh nasa taka kalpui a nih thu a sawi.
Mizoram chhunga ram ngaw te venhimna tur leh ram ngaw siam belhna turin kum 1999 atang khan Green Mizoram Day pawh hman tan a nih thu Forest Minister chuan a sawi a. Heng hmalaknate hian thangtharte rilruah leilung hausakna hlut leh dimdawi kawngah awmzia a nei thui hle niin a sawi.
TJ Lalnuntluanga chuan ram ngaw leh nungcha humhalh kawnga Mizoram sorkar hmalakna tithuanawptu leh awmze nei lova seltu ni lova tichaktu leh tihlawhtlinpuitu ni turin Green India Mission hnuaia hmathatna dawngtute chu a chah a. Leilung hausakna chu mitin mamawh leh intawm a nih thu sawiin, EF&CC department leh khawtlang mipui inkarah thawhhona leh tanrualna tha a awm a tul thu a sawi.
Chief Minister Zoramthanga kaihhruai sorkarin kuthnathawktute dinhmun chawikan a ngaih pawimawh thu pawh Forest Minister chuan a sawi a. Agro-Forestry leh Social-Forestry kaltlanga huan neitu hmathatna dawng te pawhin heng hmathatna hmang hian suma chan tir theih thing rah chi chi hrang hrang phun belh kawngah hma an lak tur thu a sawi a. EF&CC Department hmalaknain Kolasib district khawpui chhung leh a vela ram ngaw siamna tur ‘Nagar Van’ project te, Botanical Garden leh JICA kaltlangin Biodiversity Conservation & Forest Enrichment Project kalpui tur a ruahmanna siam mek a nih thu sawiin Mizoram chhung a ram ngaw awmte chu Company lian tak tak ten ‘Carbon Sink’ a hman a nih theih nan indawrna a kal mek thu a sawi bawk a ni.