Forest Minister TJ Lalnuntluanga’n nimin khan kolasib-ah Green India Mission hnuaia ‘Agro-Forestry leh Social-Forestry’ katlanga hma la tur mi 148 hnenah sum a hlan.
Green India Mission hnuaia ‘Agro-Forestry leh Social-Forestry’ kaltlang hian mahni huan neih saa thing humhalh leh eizawnna kawng a pui thei tur thing rah neih chi phun belh tura hmalak tur a ni.
Sum dawngtu loneitute hian an huan hectare khata zauah thing rah nei chi 1,100 zel an phun lut ang a, thing tiak hi forest department-in a thlawnin an pe ang a, a hmunhma enkawl nan Rs. 28,500 an dawng dawn a, nimin khan 1st installment Rs. 15,000 pek phawt an ni a.
Heng hmalaknate hi a bialtu Range Officer-ten an vilpui ang a, hmalakna hmasa hian Kolasib district chhung ram hectare 237 huam tura ruahman a ni.
Lo neitute hnena sum hlantu Forest Minister Manuna chuan ram ngaw leh a chhunga nungchate nek chepna leh sik leh sa inthlakthlengna buai nasa lutuk tur ven nan Green India Mission hnuaiah ram ngaw awmsa humhalh leh siam belhna tura ‘Agro-Forestry leh Social-Forestry’ kaltlang a hma la turin Kolasib district ah mi 237 hmathatna dawng tur an awm chu lawmawm a tih thu a sawi a, khawvel hi chenna tlak a siam tur chuan ram ngaw, tui hna leh ramsa humhalh a pawimawh thu leh hengte hi mi tin mawhphurhna a nih thu a sawi.
Forest minister chuan Kolasib district khawpui chhung leh a vel a ram ngaw siamna tur ‘Nagar Van’ project te, Botanical Garden leh JICA kaltlangin Biodiversity Conservation & Forest Enrichment Project kalpui tur a ruahmanna siam mek a nih thu sawiin Mizoram chhung a ram ngaw awmte chu company lian tak tak ten ‘Carbon Sink’ a hman a nih theih nan indawrna a kal mek thu a sawi bawk a ni.
Khual zahawm, K.Laldawngliana, MLA chuan sorkar atanga hmathatna awmte chu a nihna tur ang taka ram ngaw siam belhna tur leh eizawnna tlak tur a thing rah nei chi phun belh tur a hmalak nan hmang turin kalkhawmte a chah a, rintlak tak a hma la turin leh hlawtlin tum a tihtak zetna nen bei turin a fuih bawk a ni.